PAWISA KHAWL BAWM

Kan naupan lai khan Khawlbawm kan siam a, pawisa kan khawl ve tat tat thin a. Tleirawl chhuah kha chuan a lo har deuh tawh viau a a chhan chu nula han rim dawn leh engemaw nikhua khan mahni ta kha ruk chhuah mai a awl riau a. Tunhnu hian ka ching thar leh ta tlat mai pek a- a lo tha phian chuan ka hre thung a.

Coins

Kolkata khawpuiah hian pawisa thir chhunna(mint) a awm vang nge pawisa nawi(coins) hi a tam em em mai a, tuk-khat bazarah lek pawh kan ak haw leh teuh thin. Vairam khawpuiah hi chuan pawisa thir hi an leklam nasa ve hrim hrim bawk chuan ka hria. Ak haw teuh ta fo mai chu rilruah khawl chakna a rawn piang thuai mai a

Hlumbel kan lei a kan khawl tan ta a, thla thum-li lekah chuan Rs1,2,5 thir chuan a khat ta mai a kan han hawng a Rs2000 dawn mai a lo ni hman a-tih chi takah kan ngai a. Fate han neih ve tawh hi chuan an mamawh zawng leh duh zawng a lo thuahhnih thuahthum tun tawh mai a; lehlamah Budget system-a khawsak viau pawh hian thil man sang deuh han leisak mai chu a lo har talh tawh a. Hetianga chhungkaw Bank han neih hi tha ka ti hnuhnawh ta alawm le.

Heng a hnuaia  naupang pualho hi an puala coins kan khawl atanga kan leisak a ni a, kan lawm ve khawp mai, anni pawh an lawm na rawh e:

Tun hnuah phei chuan thla thum-li hnu lekah hawng lovin kum hnih hnuah a zavaia hawn zai kan rel ta a ni:

Note

Kum 2009 kum tawp lam khan ‘nakinah thil man to deuh hlek ka la lei ve duh takin a man sum hlawm neih mai a har si a, khawnge ka theih ang angin thlatin ka’n dah ve teh ang’ ka ti a, envelope khawng tha takah chuan pawisa note ka khawl tan ta a. Tum khatah ka dah tam thei ngai lo va Rs500 aia sang ka dah thei ngai lo. Mahse a theih anga regular chuan ka dah ve zel a thlakhata tum hnih dah tumte ka nei ve. Kum hnih zet a lo vei takah chuan a lo tling khawm ve hman nual ta mai a-rilru lamin a hmanna tur a lo zawng tan bawk nen ka hawng a, ka chhiar ta ngei a Rs14300 lai a lo ni ve hman.

Lei tur ka rilruin ka dap kual nasa hle mai a; chhungkaw thil lam aiin mimal thil chuan min buk rit hle a ni. Ka ngaih-ka ngaihtuah hnuah chuan mobile phone-hand set tha ve khai tak hi ka mamawh berin ka hre ta a. A chhan chu khawi khawiah emaw zan riakin kan chhuak a, inah kan awm tam hman meuh si lo. A chang chuan kan va riahna hmunah computer chu sawi loh TV pawh a awm ngai lo va; mizo dang awm ve lo ta chu zan lamah khua hi a har duh riau mai thin a. Anmahni hnamho chu an inkawm a, an hlim viau va-maltlat koh koh chang ka ngah hle mai a; khawhar hnem atan internet tha taka thlunzawm thei misual.com luh rawp theihna-blog pawh vil zung zung theihna, Facebook thlir ve vat vat theihna-ka mamawh berin ka hre ta a.

Tichuan, internet lamah ka budget mil tawk mobile phone tha tak ka zawng ta a, mobile compare-ah pawh ka lut zing khawp mai. Rei tak ka khaikhin hnuah Samsung Galaxy ace GT-S5830 ka lei ta a, ka hlimpui khawp mai. Ka pawisa khawl chu a zo rat a ni ber, mahse nuam ka ti thung-ka lei hnuah hian Gospel Campaign leh Rally-te vawi li ngawt kan nei leh tawh a, zan riak pawhin thawk eng ang mahila ka khua hi a har leh tawh lo. Mahniin ka tlei em em tawh mai a ni, khawih lah chu a nuamin a famkim hian ka hre khawp mai a; a hma zawnga a tha nei ve ngai ta lo chu ka en a ka lung hi a awi hliah hliah mai thin.

Ka mobile phone lei chu: