INTERNET LEH KEI VE HI

Internet hi ka’n hmelhriat har khawp a, ‘ka’n thlunzawm ve tawh teh ang’ ka tih apiang hian hotunu ber hian ‘tul ka la ti lo, kan la chhangchhe dawn chauh si i khawih hman tak tak chuang lo vang’ a ti thin a, ka ti lo leh nge nge thin a. Amaherawhchu Kum 2010 November thla khan rawn lawk sesu lem lovin ka pawt ve ta thut a-khata tang khan mut rual hun kan nei ta meuh lo. Media culture-ah hian a hla hla an pawimawh emaw tih tur a ni a. Office thenkhat pawh hi han dawr ila hla tak atanga pantu aiin mobile phone atanga rawn betu kha an pawimawh leh tlat thin-han indem thei kan ni em tih erawh keimahni pawh inenfiah a tul ve tho chuan ka hria.

Facebook

Chuan, ka’n bo tiah tiah khawp a; facebook-ah chuan kan thiannu Maruati Bualchhuak tuna England-a awm mek puihnain ka’n sign in ve ta rawih a-nuam ka ti chho tan khawp mai. Chat hlei hlei kha nuam ka ti, lal ngai lo lal zawng a lo na deuh a ni ang e-ka birh ta tlut tlut mai a – ka kham hlei thei lo a ni ber mai. Facebook hian hun a lo la hek hma khawp mai a-nupui fanaute bula ka tawlh hun tur tha tha kha a ei hek ta vek mai a, a zia lo tan ta hle. Khawiilo chhuakvak ila hawn veleh hian ka hmet nghal kauh tawh mai bawk si a –ka harhchhuak leh a-facebook chu ka chawlhsan tial tial ta a.

Blogger

 Ni hnihthum hnuah chuan Blog siam zai ka rel ve ta uaih mai a, karkhat vel awrh chauh la hmelhriat tan chuan a u lam hret a lo ni a-Innermost-I of Mozambique-te ka han rawn kual lehthul. Ka bei nasa ngiang mai bawk a, zan hnihthum chu ka tlaivar a ni hawt e; a cheimawi lam hna han thawh hian duh aia thui men a lo awl khawp mai a, ka meng leh vak mai thin. Lehlamah chuan Blog ka siam hi a lo tha phian a, internet khawvela ngawng tak thin kha mahniin ka inkheuhhawng ve tan chuan ka hriat phah. Blogger lama ka tui lai chuan khawimah ka lut ngai lo-Blog lamah ka awm vang vang a, ka chei-ka chei kual thin(naupanchhiatthlakin!!). Facebook lam ka phatsan ta deuh a blogger lamah ka insawnchhuak ta a ni ber, Blog lama han post mai tur lah ka tlachham ru deuh riau thin; ka zir ve lam Theology han post dawn ila, mi dang tan a interesting dawn lo ropui si-secular lama ka subject Politics lam han post dawn ila awm ka ti chiah si lo; contemporary indian politics hi chu news paper leh TV News lam atang hian ka hre ve nual chuan ka hria a(hre tak chu ka ni chuang lo) han sawikual vel chiam pawh ka chak ru ve viau thin. Mahse thahthiang lo thatah ka inchan dawn tih ka hrereng a, sawi loh ka duh ta zawk a. Sawi tur lem nei lo ta chu a ropui ber ang ziazangin mahni chanchin ho-tete kan post ta fo mai a ni ber. Mahse Blog hi a tuiawm reng chuan ka hria.

Misual.com

A hming ringawta ka nel miah loh, ka luh hnua chhuah lehmai har ka tih ber chu Misual.com hi a ni. Thu kan han chhiar a, an comment kan han chhiar zui a kan ngaihdan lo deuh kan han hmuh khan sawi ve kan chak sakhai a. Kan han sawi ve a, min chhanlet dan kan ngaichang leh a-min rawn chhang a, chhanlet  ve  a lo tul leh a, kan han chhang a…kan inchhang kan inchhang ta mai a ni…mi fing tak tak an ni a, an zingah chuan te hlein inhre mahila hmel inhmu ta lo chu zak bik hek suh i ka tawng ve fawk fawk chang a tam mai. Ka tui bawk a, zankhaw tairekah pawh ka la comment tlat tlat peih-thian tha tak takah an chang dawn hian ka hre bawk. Chutiang a nih avang chuan ka post ve ta fo mai a-nikum 2010 December bawr vela hmelhriat tan kha a inla senior pawlah ka tang vel ni berin ka hria. Misual.com hian thil tam tak min hrilh a, ka chhawr khawpin ka hre bawk. Facebook leh Blogger malmak deuhthawin ka misual ta thin a, a zia lo lek lek mai.

Ineternet khawvelah hian la naupang hle mahila kei aia senior-kei aia la man lo ka hmu teuh tawh a-ka luh ngun vang leh ka tih kual hnem vang pawh a ni ang chu. Mahse technically chuan bo tak ka la ni. Kum khat dawn internet ka khawih ve ta. A hma zawng chuan ‘khawih ve rawh, mail hawng rawh’ an tih pawhin ka duh ngai lo va-tunah zawng ‘lut hrih suh’ an tih pawn kan lut fo ta mai zawng a nih hi. Mahse chhungkua leh mahni hna bawhbo thaka buaipui erawh ka duh miah lo thung…ka in-check nasa thin reng bawk. Internet leh kei ve hi mi dang experience atanga teh chuan beitham hle mahse, kan inawmtlei khawp chuan ka hria, ka parawl hlei hlei khan min hnemtu tha tak a ni.