INHNIAL

Inhnial hi lehlamah chuan a tha lo zawnga sawi theih a nih rualin a tha zawnga lak theih pawh niin ka hre ve tlat pek a. Mi dang hnial a an point phehthlaksak tur chuan point tha tawk tak neih ve a ngai a, chumi point nei ve tur chuan hriatna neih a tul a, hriatna nei tur chuan inchhiar zauh a tul bawk. Tin, kan hnial avanga kan hnialte atanga hriatna kan lak luh pawh hi thil hlu tak a ni ve reng reng a, inhnial hi ka sawimawi vet lat a ni. A pawng ataka hnial tur zawn hrim hrim hi a tha hauh lo va, subject pakhat sawiho va, ngaihdan inhmu lo laite sawi a, a tul chuan mi ngaihdan hneh tura hnial hi a tha hle. Tin, inhnialna hian keimahniah ‘critical mind’ min pe a, thil a nih anga a tluangtlam maia thlir lo va, a lehlam zawnga thlir dante min zirtir a, tunlai khawvelah ngat phei chuan eng exam-ah pawh hian zawhna tluangtlam hi an zawt tha duh tawh lo va-hmana zirtirtute hman ber, ‘Describe briefly’ tih aiah ‘critically examine’ tih vel hi a hluar tawh zawk niin a lang.

Ka tui zawng ni bera ka hriat tak chu inhnial hi ni ta berin ka hria a, inhnialna atthlak leh inhnial avanga thinrim a tharum thawh lam chu ka duh hauh lo thung. Mi dangte chu cho rual ni lo mahse kan tleirawl lai hian phak tawkah leh hmuh tawkah chuan lehkha ka chhiar nasa ve hle thin chuan ka hria a, kan khaw YMA leh Kohhran Library-ah khan a lawr hnem pawl tak ka ni ve thin. Chu chuan thiante hnial hi min ticho hlein ka hre thin a, thenkhat inchhiar zau zawkte ka hnial chang a awm a, chu chuan chhiar belh tura tanna min pe thin; khawdangah school kalin Hostel-ah ka’n awm leh a, hostel atang chuan lehkha chhiar mai tur dap a har hle a, chhungte pawisa min thawn hian thla khatah bu khatte ka lei ve thin a, nuam ka ti ve hle tho thin. Hostela kan awm lai hian inhnial kan hrat hle mai a, kan Warden khan tlaiah infiam ngei ngei tur angin dan a nei a, Foot ball, Volley. Table Tennis, Batminton, Basket ball leh Carrom tal khel lo kha chu hrem tur an ni a, infiam aia inhniala kan tluan zak kha a tam mai a, ka thianpa kha nuam a ti ve bawk a chaw nghei dawn dawn khan Politics, Ethics&Moral leh Literature subject khan kan inhnial thin a, kan kham ngai lo.

Aizawlah mi inluahin College ka kal leh a, ka inluah kha chu inhnialna hmun a ni leh ringawt mai a- a nuam thei hle a ni. Ka inluah atanga hnaivaiah Library a that loh avangin Chanmari West-a Khawtlang Library tha zetah chuan member nih ka dil a, an lo remti a, ka hawh ta thin a. Tin, college Library atang ka hawh theih bawk avangin tawk fangah ka ngai a chung hmang chuan tan hmunte ka siam a, inhnial kan tui thei hle. Hetih hun laia ka thiante kha an ngaihawm hle hian ka hre thin a, inlungrual tak maia kan han inhnial rap rap mai kha a ngaihawm ka ti ta ber mai. Chaw chhum theihnghilh thak thak khan eng subject emaw kha kan phak tawkin kan sawi a, duhtawka kan sawi leh ngaihtuah tawh hi chu hmun dangah mi dangin sawi ve mahse kan ngaihsak peih vak lo kan intiril ru riau thin-kan lo mawl e.

Tumah kha infiam lam tui kan awm lo va, literature lama tui (inti) thah kha kan ni a, nuam ve  hle thin; tunhnu hian kan nunhluiah zin let leh dawn ila kha hun kha ka ngai bera ka zin duhna tur a ni ang. Fing takin kan lo mawl a, mawl takin kan lo fing thung nite hian ka hre thin, thu tluangtlam put put maia mite chhan a lo ngaih takah hian lunglen a zual thin a nih hi.

College kan zawh khan ATC lamah BD zirin ka inpulut ve leh a, Library a lo changtlung tha bawk a peih bak chhiar tur a awm. Inhnial chu a la nuam reng a, ka thian pakhat fing leh ril tak, ka tluk ngai loh tur nen hian kan inhnial bang lo; tumkhat phei chu kan tlaivar dawn hial mai –Plato Philosophy kan sawi tumin. Theology leh Philosophy hi Literature chhulchhuakah inunau bik inkawpchiat mai an ni a, tin, Social Issues velte kha a hun lai khan ngaihnawm lo mahse inhnialna a titam a, a nuam phian. BD chu thiam ber nei pawha inhre lovin kan han zo ve a, tun thlenga la nuam ta reng mai chu inhnial hi a ni. Inhnial ila inkawmngeih siin, tih hi ka duh dan a ni reng.

Ka sawi tum ta ber chu inhnialna hian rilru mu mai mai tur hi a chawkharh a, a tichak a a tinung thin; inhaw lovin inhnial ila, kan inhnial point sawhnghet turin  inchhiar zau ila tih hi ka duh dan a ni reng mai.