NUNHLUI ZUNPHUR LO

(Tunlai chu ka vir buai hle a, hna leh chhungkaw lam thilah Zoram lam ka chuang chhuak zut mai a, haw hnuah pawh hna bawkin min lo hmuak leh a; nupui fanaute han kilkawi a tul nen Blog lam pawh ka update hman meuh lo a ni. Ziah khat hian ziah tur a lo vang chawp mai bawk a, chu achhapah ngaihtuah dang a lo tam nen...Blogger Friend-te in zahawm hle mai. Misual.com lamah comment pahnih khat kan thlauh hman tawk a ni ber-Hun a thawl ve leh mai ang)

POLICE-IN MIN ZAWNG:  BA kum hnihna kan zir laiin ka ni fanu hian an school hlui lamah Transfer Certificate lakpui atan min sawm a, ka hman bawk a ka va hruai a. Dawrtu kan tam hle a kan nghak rei ang reng viau va; an headmaster kha a lo polite lo viau mai a-document kan lak turte chu ‘kan mamawh lo la daih r’u’ a lo ti a. Ka ngei ruk deuh avangin ‘keinin kan mamawh a lawm kan la daih reng ang’ chhuah pahin ka ti nghe nghe a ni. Hemi ni ber kher hian he school-ah hian pawisa(an sawi danin thawktu pakhat hlawh) a bo a ni awm a, keini kha min lo ringhlel chu niin FIR an thehlut ta a. Ka cher lai a ni a, Drug addict pawh ka ang viau ni tur a ni; hetih lai hian constituency chhunga zirlai pawl conference-a hruaitu chan kan chan ve deuh lai kha a ni a, conference nei turin kan inbuatsaih a ka buai hle a. Police lam khan engemaw titi-in min lo zawng chhuak a, ka in luah lai kha an rawn hmu a, ka awm ngai loh lai a lo ni bawk si.

Kan khaw lamah ka awm a, camping-ahte ka va lut lawp lawp a, zirlai pawl conference neih tur chungchangah minister-te kan hmu bawk a inah pawh ka awm hman meuh lo a ni ber. Hun a thawl deuh lai chuan ka in luah lamah chuan ka va kal a chhuat laiah hian lehkha hi a lo let bal a, police lam atanga in-report tura kohna a lo ni a. ‘Hemi ni hmaa…’ tih tahrik chu ka’n en ‘vawiin’ chiah kha a lo ni a, ka tlai thelh a ni. A rang arang chuan police station-ah chuan ka ni fanu nen chuan kan va kal a, nilengin min dawp dun ta a ni. An FIR-te chu ka chhiar a, min lo puh chiang em em mai lehnghal a sawi tur ber pawh ka hre lo. Nih loh lutuk hian phat ngaihna pawh a lo vang kher mai.

Lock-up-ah min khung an tum a, ‘min khung vaih chuan ka khinglet ang’ ka ti a, min khung ta em lo va. Police chuan min ko hrang leh a ka ni fanu chu ‘a ni thei mai lo maw, nang chu i ni lovang’ te an ti a, min chhimbudawi nasa viau. Zan a lo nih takah chuan leh engmah hmasawnna tur an neih loh takah chuan min kaltir mai an tum a, mahse in-report thin turin min ti a, ka duh thak lo. Case nei pawh ka la ni lova in-report a tulna ka hre lo va, mahse a tul chuan min ko mai zawk turah ka ngai a, an thinrim hle thung. Heti hian ka ti ta a, ‘kan khuaah va kal ula in duh leh, ka naupan tet ata thil pakhat pawh ka ruk tawh thu an hrilh che u chuan he thil hi ka rukah in ngai ang a, min man dawn nia’ ka ti a-ka confi hle a ni. Engmah thuleh awm ta lem lo chuan min chhuah ta a, engmah ka hre zui ta lo.

Hun a liam a he thil hi ka hrereng hran tawh lo-mahse tumkhat chu Pathian thu ka zir hnuin Theological college-ah programme lian tham tak kan nei a chumi tum chuan pawisa rua min puhtu hmeichhia kha ka hmu ta tlat mai a nih chu. Ka hmuh rei loh tehlul nen kha hmeichhia kha kum 5 liam hnuah pawh ka la hre thei a mak ka ti hle.  Mahse ka insawichhuak duh hran lem lo va, kan rawngbawlpui nupui a lo ni a, mahse a chimchin awm tawk vel chu hre thovin ka inhria. Khati zatin an dawr a, pawisa a bo va min puh bik kher kha ka hrethiam chiah lo va – an headmaster(FIR sheet-a hming ziaktu) pawh kohhran upa a ni a, ka hrereng a - tumkhat phei chu kohhran thiltih pakhatah hian kan thuho va ka chanchinte min zawt nual a, ka sawi ta lem lo. Sawi ila zak tak maw le. Min puh dan kha ka ru lai hmu niawm hrimin a ziak lehnghal a, nakinah an veng ka la bial tak leh ka sawi lovang pawh ka ti chuang lo-nuihpui mai maiah.

Hetih lai vela ka in luahna thenawm pa chiah hi pa mak tak a ni a, mi rethei deuh hi chu a hre duh vak lo va. Kum thum zet an inbula ka awm chhung khan kan inhmuh apiangin tunge ka nih min zawt ziah a; ka sawi ve zel mai bawk a. Sawrkarah chuan a thawk ve a UDC ni tain ka hria. Pastoral line-a ka kal tak hnu hian an vengah ka va leng a, an kohhran upa fel tak nen chuan kan titi a. Ani pawh chu a awm ve reng a, tunge ka nih min zawt leh a-chu kohhran upa chuan ka sawi ai chu min sawi khalh ta a-‘I in bula kum thum zet a awm a, i hre lova maw a va mak dawn ve ’ a ti a, sawi tur reng ka nei ve lo. Chaw ei-ah min sawm a, ka kal ta lo.

VDP-IN MIN DAWP: Dendrite hi an hnim rui thin tih hi thingtlang lam tleirawl chuan kan hre ve thin a, kan hnim ve ngai hran lo. Khawpui tleirawl a lo zina kan inkawm a, dendrite hnimpuiah min sawm a, ka duh lem lo va. Mahse a hnim lai chu ka hmu duh a ka zui ta a. A hnarin a hnim ang chu ka tih laiin a ka chuan a hip ta kawk kawk mai a, a khuh chiam mai bawk a-mak ka ti hle. Mei ka zuk ruk ve thin avangin ‘engtin nge a awm?’ tia ka zawh a, ‘a ru’ a tih awmzia pawh ka man thiam ve. Ani, kawm tur nei si lo chu ka kawm ka kawm ta a, tum khat chu ka hriat ve reng reng chak avangin ka hip ve ta a.

Chupa haw hnu feah chuan an ti zui ta luih luih a; zan khat chu lehkha ka zir a, ka tui khawp mai a ka thiam zung zung mai bawk a. Chutia tui taka ka zir lai chuan kawngka an rawn kik a Lalmuana-a lo ni a, ‘Ropui VDP-in lo kal vat rawh an ti’ a rawn ti ta mai a, ka phili nasa hle a ni. Ka va kal chu Dendrite hnim thinho an lo khawm a, ‘hnim ve tawh zawng zawng sawi r’u’ an tih khan hmai phihfai nan tumkhat  ka lo hip ve kha an lo sawi chu niin buaithlak ta zo vek mai. Naupang fel pawla sawi ka ni ve reng reng a(chapona ni lo se) ka hming an sawi khan naupang na na na chuan himpui tur deuhah min lo ngai a ni awm e. Ka nu leh pa-in tlaivar deuhthawin min councelling-a, ka u hian a thinrim apiangin min chhaih nan a hmang a-ka hip ve zuai atanga min koh inkarah hian kum hnih a tla hman hial a. Kum sawm a vei leh chuan VDP tih kha JAC-tiin an thlak a hetah hian Asst.Secretary ka ni leh tawh. Zirlai pawl aiawhin min teltir a, minute-te chu ka ziak ta ber a-mi kan dawp apiangin min dawp zan kha ka hrechhuak ziah ta a ni.