THIHNA

Electric switch hi kan duh hunah kan on a a lo eng a, kan duh hunah kan off –a a thim leh ta ang mai hian kan nunna pawh hi a neitu leh vawngtu kutphah chhungah chuan a then vel a. Engemaw chen atan min on-a, engtik niah emaw chuan min off ve ngei dawn chu ani si a le. Thihnain kan chungah, keimahni chung ngeiah thla a zar ve hunah chuan zokai perhte an sawi ang mai leh pate buan thiam an sawi ang mai hian a ri phat mai dawn a, eng zawhna mah siam hman ani lovang.

Ni, thihna hi a tirtuin a tirh chhuah tawh hi chuan kawngkhar hnana dan mai chi zawng a ni miah lo, hlate khuaa tlan bosan chi lah ani na hek lo; min nangching a min la mai dawn zawk a ni. Damdawi leh mihring thiamna hmangte hian he thihna hi chelh leh tihkhawtlai an lo tum fo tawh thin a, mahse an hlawhtling meuh em le? Chelh khawtlai nia kan hriatte pawh hi an hun a la thlen loh vang mai zawk ani lo maw?

Pa rorum leh hrat khawkhengte pawh he thihna tawnah hian a lo nem tawh a, lal ropui leh mi hausate tan pawh tham lungawi theih a ni lo. Nula hmeltha leh tlangval pianthate pawh bawhbetin an mawina zawng zawng  engtiklai maha in bel leh tawh ngai lo turin a kalsan a. Naupang riru thianghlim, pawmlai nei leh fa hrawk chawm a sawi lova, chhangchhe nu leh pa a thliar hek lo. Chelh ding tura pen chhuak mi fing, mi ril leh mi thiamte chu kut hnungkhirhin a hawtir a, an thih chian zia hril tur leh a thiltihtheihna puangzartu atan a hmang ta hlauh zawk a ni.

Kan hmangaihte leh kan thenrualte thinlung khauh chu mittui hmangin kan hneh thei mai thei e- mihringte inkarah chuan Tui liana zawnga daikai har ber te pawh lo ti fa hmiang. Mahse  a ni erawh hi chuan mittui avangin a tum a thulh lo, a khawnbawl leh chekawite chu tahna,khawharna, lungngaihna leh beidawnnate an ni; mual an hrut a tlang an bawh a lal kawng an kian lo va, lal lo kawng pawh an kian chuang lo. An thawm thang vel chuan lairil a fan a,  thauah min man thin.

Nun chu a mawina zawng zawng nen a par a; a ni, a vul chiai thin. Mahse khawvel thil ral thei ang mai hian an ral zel a, han ti viau pawh ni ila a tawp chu thihna  a ni. Kan vela mite thihna hi hlunlo tura siam kan nih  thu reminder tha ber a ni. Kan hlunna tur hmun leh thihna thuneihna piaha lama nun neih hi a finthlak ber.

Zan thim lo thleng tur atan eng kan ngaihtuah thin a, ruahsur hnuaia pawh tawm hul na tur kan dap a, thlasik vin tuk mai hmachhawn turin thuam lum kan enghelh thin; ran mai maite pawn an himna tur an hria- Emau daireh kha khualzinte tan a khawharthlak a, awmpui tur an sawm ta rawih ang khan thihna kawr ruam khawharthlak tak mai kan zawh laia awmpuitu kan neih phawt chuan mi vannei kan ni hawt mai. Chutih hunah chuan Thihna tih chu nawtrehin Nunna tiin kan thlak thei tawh ang.