KA HUL

Dt.4.2.2011. 11:23pm: Tuma chim lohvin hun thawl tha ka nei bawk a, khawnge zanin chu mahni duh lam lam hawiin ka’n sai pawp pawp teh ang ka tih rilruk laiin ka’n tan dawn a nau mut fuh zan ang maiin ka hul phak mai. Ni danga kan buai berh laite khan a lo haw huau huau kha a ni thin a, eng ka ti nge ni? Ka’n beih ngial pawhin bui lung tawk ang mai ka ni ka pamtul thak zel, hetiang deuh hi a ni ang thuhriltu thenkhatin ‘ka ka a kal lo’ an tih thin chu; zanin zet zawng ka kut a kal lo ti ve mai ang. Tum khat chu Revival speaker pakhat hi kan ruai a, thu a sawi teuh ang chu tih nak laiin pulpit atang ‘ka hul tlat, ka sawi thei lo’ a ti a, eng bar a sawi ta lo reng a;  a hnuah kan hau va ‘i tawnhriat atang ringawt paw’n sawi tur i kuh tul lo’m ni’ kan ti a, rawih nawn tlakah ka ruat lo. Mahse ka a kal loh na na na chuan a har ve bawk ang chu.

Mizo tawng hi chu thu hran pawh lo ni se kal vak lo pawh hian mahni pianpui tawng anihna laiah ‘ka tihna’ kan ti a, a fel leh mai zel a. Tawng danga thusawi hian kan la thiam tawk loh vang chu ni ngei a, a fuh loh tum vek vekah chuan a mi deh dan a dang khawp mai. Lei hi a tawt tup mai a, chheh fuh loh laklawh phei chuan chhing sawk chunga lam hialte a tul thin. ‘Thusawi tura inbuatsaihna tha tak pakhat chu mut tam hi a ni’ ka tih thin hi kan thianpa pakhat chuan a lo la kawi pek a, ka mut apiang mai hian ‘a inbuatsaih leh ta’ min ti thin. Ka ngaihdan chuan mu tam ila, kan mut tam phawt chuan lei li hi a perh a tha a, kan ka a kal tlangpui thin. Phak tial tual, mutmu tuah tha lo, meng sen rum chung chuan lei pawh a khawr deuh tlat hian ka hria.

Ka hul viau chhan hi ka nauawm nasat vang hi em ni ni dawn le(?)te ka ti. Ka nauawmin ‘apa bawk rawh’ a tihin ka bawk a, ‘tho rawh’ a tihin ka tho va; ‘lam rawh’ a ti a, ka lam a; ‘zai rawh’ a ti thul ka’n zai a, ‘lo sa ve suh’ min ti leh si a min bawl kual lu deuh a ni.  He lama ka hul paw’n an tan ka tuihnang alawm le. Thute hi sawi a pung, ziaha ziah leh tur hriat belh thil a ni a, kan sawi chhun chu ‘tawk suh’ ‘I tla ang’ tihte hi ania a pung tual tual mai lehnghal. Zana an mut hun nghakin ka hmanhlel a, an han mu reh ta cheng a rei vak thut hmain dar 11 a lo ri a. Han tui laklawh tawh chuan kar lovah dar 1 kan thleng thuai a; zing dar6 velah beng bula motor lem khalhin a rawn vu leh vut vut a, chutah chhip atang hmai lam panin a’n nawr thla  a khabe kawnah an inturn chiah chu tu pa nge meng kawk kawk lo vang.

Heti reng renga kar hnihkhat han mena thawh hma leh bawk si chuan pum lam nikum hmasa lama dam tawha ngaih kha a thikthu a rawn chhe thar leh a. Pumah hian thluak tlem a lo awm emaw ni pum ber a that loh chuan kan chawhnu ruih mai a, a hnunah hian a fu ngur hian a hriat a ngaihtuahna a bing mawh khawp mai. Zan hi men a nawm tehlul nen zan meng leh tura thawh erawh chu a peihawm loh hle mai bawk si ; chutiang thuar tham vel atang chuan kei laisen lungmawl hian han tuihnan viau ka’n tum pawh hi ka cho loh ka rim a ni ve hrim hrim.

Hul hi ka phu a ni. Kan dam ang a, naupang an dam ang a rilrua a awm laia ziak chhuak ve hman tura khawsak theih hun kan la nei ang chu; zanin atan chuan ka hul ni teh se…