KA NGAIHTUAH LEH THIN

Tut timing lo

Kum engemaw zat a kal ve ta, hostel-a kan awm lai thil thleng a ni a. Kan Principal-in zan tlai tawh takah hian phone call a dawng a, rang taka rawn tlan thlain “Thana mother has passed away” rawn ti ta mai a. Chu thu thinthawng tak maiin min han den takah chuan tumah mut tuma ram pawh kan awm lo. Thanate unau(a nau a awm ve bawk a)chu an tap hlap hlap mai bawk a. Tumah a thih chhan  hria kan awm lo, Thana lah chuan ‘vawiinah pawh kan inbia a, dam lohna a nei lo, a va’n mak’ a ti a, a tap tlauh tlauh mai bawk si; kan principal(brother) lah chu kan biak nawntir ngam bawk si lo va, tunlai angin mobile awm se khatiang tak khan kan buai lo tur. A zui turte kan inruat a principal motor chuan an thawk chhuak ta a. Aizawl an luh chuan a kal zinga thu ber kan ‘sir’ kal ve chuan pangpar lei a rawt a, pangpar lei tur chuan an ding ta a. Chutih lai tak chuan Thana chuan an veng mi pa pakhat hi a va hmu a, ‘sir’ chu a hrilh nghal a. ‘Sir’ chuan thil awmzia zawt chiang turin a va pan nghal mai bawk a. Chuta ‘sir’ rawn let leh chu a nui ta ver ver mai a, ‘Thana i nu ani hlei nem, i pi zawk alawm thi’ rawn ti ta mai a. Chu thu Thanate unauin an han hre zet chu Thana insum zo ta pek lo chuan ‘ka pi a thiiii, ka va’n lawm’ tiin a au ta piap piap mai nih chu; miin an en duh kher asin. Hetiang hi thil awm dan chu ni- Principal hnena a thih thu rawn sawitu khan ‘grandmother’ chu ti ve ngei a, mahse ‘grand’ laiah khan phone kha a lo tut a, a ri tek tek mai bawk hi a lo ni awm a, a pawimawh lai tak kha a lo ni kher bawk si a. Principal lah chuan mizotawng a lo thiam lo nen an inbe zui rei ta lo kha a lo ni. Kha phone tut khan mittui a ko thla hnem kher asin! Tut timing lo ve tak a ni.

Dawn tisei

A tawngtuin mi pakhat hnena a sawi, a ngaithlatuin mi pakhat a hrilh chhawn- chu pain kohhran upa pakhat a hrilh- min hrilh chhawn ve leh thu hi ka’n sawi teh ang -a sawi angin ka’n sawi ang e. “ Kan fapa berin min liamsan ta bawk a ka’n sawi ang e. Mizoram Assam state hnuaia kan behlai kha a ni a, Assam police-ah ka tang ve a ka nupui leh fa hmeichhia pakhat nen police bahrik-ah chuan kan khawsa ve a. Kan fa pahnihna tur chu kan nu chuan a pai teuh bawk a. Kan bahrik lehlamah chuan Bengali vai chhungkua hi an awm ve bawk a, an nu chuan kan nu naupai zat thla chiah mai chu a pai ve teuh mai bawk a. Bang insi renga awm kan ni bawk a ka inluhchhuah hneh hle a, an fapa leh kan fanu pawh an inkawmngeih em em a ni. Hun a kal zel a, kan nu leh kan thenawm nu chuan nau an vei ta a, vei rual chiah phei chu an ni lo ‘marawhchu an hrin erawh a rual hle a ni. Damdawiina nauchhartuten ‘hei in nau chu’ an rawn pawm chhuah chu ka’n en a, a hmelah chuan mizo hmel reng reng a lang lo, Bengali dik tak mai hmel hi a pu a, mipa fa a ni. Chutih rualin kan thenawmte naute erawh chu mizo hmel dik tak mai hi a ni thung a. Kan nu nen chuan kan fa tura an rawn pawm chhuahah chuan kan lung hi a awi thei ngang lo a ni, awi thei lo ve ti lo chuan han tih ngaihna vak kan hria pawh a ni chuang si lo. Kan thenawmte erawh chu hmeichhe fa anih avangin leh a vun rawng a ngo em avang chuan an lawm hle thung mai si a. Ka insum zo ngang lo chuan an nurse pakhat hnenah chuan ‘in tisual ani lo maw’ tiin ka va sawi a, an lo thinrim zawk zawmah bawk si a, kim lo deuh chuan kan chhuak ta a ni. Hun a liam zel a, kan fate pawh an lo tlei ve chho tan ta a, kan thenawmte nau chuan kan nu hmel hi a rawn phawk chhuak tak meuh a ni; a rawn leng fo va, ‘papa’, ‘mama’ tiin min ko mai thin a kan rila rah hi niin kan hriaa kan fanu ang chiahin kan en a ni. Kan fapa kha a lo lian ve zel a, a hmelah mizo hmel reng reng hi a lang lo kan thenawmpa hmel chauh lo chu. Assam atanga Mizoram kan inlak hran dawn khan keini pawh kan duh lam lam zawm turin duhthlan theihna min pe a, kan han ngaihtuah a mahni ram ngei zawm chu thain kan hria a, zawm pawh kan tum a ni. Amaherawhchu, kan fanu avang erawh chuan kan hreh ru em em a ni mahse  kan ngaihtuahna pakhatah chuan zawm lo pawh ni ila engtikah emaw kan insawn a tul tho tho dawn si a kan ti ve bawk a. Kan chhuah hma zante chuan kan fanu chu a lo leng a ka malchungah thuin ‘papa’ min tisek sek mai a, kan nu malchungah a lawn thul awm ngaihna a hre lo a ni. Thlalakna awm se a thlate pawh han laksak tur hi ania, kan nu nena an inan ziate pawh in hre ve tur. Zan kan han mute chu kan muhil lo reng reng, kan nu phei chu a tap tlaivar ani hawt mai, kei pawhin pachan har ka ti. Kan nu hnem nan chuan ‘anih leh inthleng leh duh se i duh ang em?’ te ka han ti a, a ni lah chuan a hnute hnea lo seilian leh harsa taka a lo enkawl seilen kan fapa han kalsan chu a’n ngaihtuah chhin pawhin a ngam bar chuang si lo. Khanglai kan dinhmun kha a va han hrehawm em ve aw! Mami kha khawnge a awm ang a, engtin tak awm ve zel ang maw mualpho dawn lovin ka’n sawi chhuak tawp mai ni.” He thu hi ka hriat dan zawng chu a ni, dawt anih chiah chu ka ring si lo, dawn zawng a tisei ngei mai.