THE GUITAR

Ka thianpa Tluanga hian a pute tingtangin ‘Liandote unau unau’ tih a tum thiam a, “Ka dawn thin ropuina ram khi” tih a beat thiam bawk a, mipa naupang thingnawi fawm rual lek kan nih lai a ni fahmiang, miten an lawm hle thin a, ka awt ru veng veng thin. Kei chu engmah ka la thiam ve lo va, tingtang perh  thiama exam zawh zana PHE Quarters hlui chunga keima perh ngeia thianhova zai kha ka chak bang thei lova ka mut hmunahte hian ka suangtuah rauh rauh thin a ni.

Thingtlangah kan awm a, ka nu leh pa hi khawpui lam chhuak an nih avangin khawpui lam mi hmel hriat an nei nual a, chuvang chu a ni ang kan inah hian Buhfai phur Jeep hi an thleng chamchi reng a. A chang phei chuan kan kawtah hian motor sawm dawn dawnte an intlar put thin a, naupanga thukhawchangin kan lo intithei ve em em thin a. Kan chhungkua chauhva kan awm zan hi a tlem khawp mai a, khawhar in ang mai hian mikhual hi kan chhuatah hian an mu phung thin a, nuam kan ti ve em em thin a, ka nu buai tur thin zia kha aw!

Chung Driver ho zingah chuan a ni, dam zel pawh ni ila tar-atin min bawh buai thleng pawha ka theihnghilh theih loh tur awm chu ni, a hming-Danglova chu. U Danglova chuan ka tingtang awh zia a hria a, a neih thu min hrilh bawk a; a nei tih ka hriat ringawt pawha ka lawmna chuan, “ka pe ang che” a tih phah ta hial a, chuta chinah chuan ka thiante zingah chuan chungnung ta hle hian ka inhria a, min kawm duh lo leh ka thu awih duh lo chuan an perh ve ngai dawn lo tih hi ka thu rolum chu a ni. Sikulah ni se, ka sawi bang lo va, kan pawlah kei aia u ve ve Ngura leh Chhunga inkarah ka thu a, ka ngam loh ve ve te an ni. Mahse tingtang ka neih dawn avangin min tlawn a, min chhan a, tuman min vel ngai lo. Tingtang, company siam hi kan naupan lai khan kan lo duh tlang khawp mai kha a lo ni.

Ni hi a va vei muang ve, U Danglova lah kal lam chauh a ni a, a buhfai phurh a va dah ang a, a lo let ang a a va phur leh ang a, tahchuan a lo keng tawh dawn. Ral lehlamah motor a ri em, motor a lo kal em tih hriat nan hian leiah beng siin ka’n ngaithla vang vang a, ka chhungten min nuih a. A lo kal ta ngei e, zepnak emaw, motor hi ka um nasain ka bet nasa bawk a kan khuaa motor lo kal ngun deuh ho hi chu an motor ka hmuh hma hauh pawhin a ri-ah tu motor nge tih hi ka hre lawk vek thei. Sangate unau motor ri te, Pu Sundea motor ri te, Pa Engmawia motor ri leh a dang dangte pawh kha vawiin ni thleng hian ka bengah a la cham.

Kan kawt piah kawiah ngei chuan U Danglova motor chu a lo lang ta a, ka hmuh ve leh chuan ka te cheng chung mai a, kan inah an lo chawl a, lawm em emin tingtang chungchang chu ka zawt ta a. U Danglova chuan pawi tih hmel takin, “ka theihnghilh tlat, a va pawiii” a ti a. Hnual khat chuan ka hnual a, mahse ni danga tan min tiam leh avangin ka beidawng chuang lo. Ka thiante an lo kal a, tingtang ka neih tawh leh tawh loh an rawn thlithlai a, ka la nei lo; ka inchhuan vena tur nikhua a sei deuh dawn chuan ka hre na a, U Danglova kha ka la ring tlat a ni.

U Danglova a lo kal leh a, a ngai chiahin a sawi leh a; chumi hnuah a lo kal leh fova a rawn keng ngai chuang lo. Tingtang vanga min kawmtute, ka thian bul pangngai ni lo ho chuan min tinsan tawh a, min kawm an chak tawh lo. Sikula ka bula thute pahnih pawh chuan min dim duh tawh lo va, ni khat phei chu compass-in min vit thi hial a, ka tap ta a..U Danglova vang vek a ni. Ka beiseina chu a kehchhiat vek tawh avangin U Danglova rawn kal pawh chu ka thengthawngah a lut tawh lo va, a hmel ka hmuh erawh chuan beiseina tereuhte hian min la zem deuh tih mai loh chu.

Kum tam a vei ve ta, tunah nupui fanau neiin in leh lo invawm hrangin chi bur kan han tung hrang ve ta a ni a, mahse ‘Liandote unau unau’  tih ri ka hriat hian U Danglova kha ka mitthlaah hian bialnu hlui ngei zui  ang mai hian a lo lang ziah a; amah avang khan miten rilru leh tihtakzeta mittui nena an sak, “Ka dawn thin ropuina ram khi” tih pawh hi ka sa ril ve thiam lo, amah U Danglova hmai hmel kha ka rilruah hian a lian tlat a, Ka taksaah hian hling mi pe a ni…tih kha ka chan deuh ber thin; tun hnua ka hriat leh hian U Danglova khan zu a nghei a, lehkha thiam a ni bawk a, Sawrkarah hna tha tak a thawh tawh thu leh rawngbawltu tha tak a ni tawh a ni awm e, ka hmu leh a nih ngat chuan patling nih hnuah pawh ka la leitir reng reng ang maw le, a nih loh chuan a sermon ka ngaithla tui ve thei lo vang.

Aw, tingtang(Guitar) kha ka va nei ve teuh em, ka naupan lai khan, tun thlenga tingtang perh ka thiam hle lohna chhan hi khami vang kha em ni ni dawn!!!!!?????