NUN SUAR

Kum 2008 Synod inkhawmpui chuan Kolkata Mission Field-a Mathurapur Bial enkawl turin min ruat a, kan chhungkaw dinhmun ka ngaihtuah a ka huphurh ru hle. Kan nu, naupai haw tak chuan thla 6-na a hmang mek a, a la luak reng mai si; thisen chaw bur engemaw zat kan khai tawh a, chu achhapah ka pa cancer vanga na kan enkawl lai mek a ni bawk si, kan chhungkuaa ka mawhphurhna hrang hrang ka thlirin han bo daih chu hun hian ka hre thei lo hle. Mahse hlawkna lam aia inpekna lam hnaaa kan uai tang anih tawh chuan mahni duh dan palzam a tul chang a tam bawk si. Tichuan kum 2009 kum tirah  khawhar ru tak chungin  Kolkata lam chu ka pan  ta a ni. Kolkata ka thlen achinah rilru buaina tur min tlakbuaktu a awm chho ta zut mai a han tarlan ve hrim hrim ka’n duh a ni.

Tlai lamah kan nau, ka chhuk thlakpui Orissa-a Agricultural scientist awm nen kan leng kual vel a. Mizoram lam atang chanchin duhawm lo tak mai ka u(mipa)te nupa min rawn thlah tura lo kal mahse ka hmuh hman tak lohte kha an haw lam Bike-a an chuang chu 407 Truck-in a su(a su ti ila a palzut a ni ber awm e) a thichhawngin Kawnpui Civil Hospital-ah an let dun reng tih min rawn hrilh a, ka mangang hle. Motor 407 khalhtu hi tlaivara khalh anih avangin a muthlu a, ka u-te kawng sira lo ding chu a va kapzut a ni ber a hmuna hmututen an sawi danin an thi lo kha a mak zawk hle.  Min hrilh duh lo nang a, ka hre tho si a, mahse rilru hrehawm takin ka awm ta a. Ka awmna tur khaw kawngah ‘Mela’ an neih avangin motor kal thei hek lo Kolkataah chuan engemaw chen ka tang ta rih bawk si nen rilru min delhtu a tam hle.

Ka awmna tur hmun ka thlen hnuah rei pawh awm lovin vai nuho khawmpui lian kal hruai turin min ruat a(ka tan a remchan vang a ni) Mizoramah ka han hawng lehnghal a; naute neih laia awm ka duh vang a ni. A pai chhung a hman nawm loh em avangin ka ngaihtuah deuh va. Naute kan han neih chuan a nun a pai laia thil a ei that loh em avangin  a lian lo hle a, a pianhlim atang enkawl a ngai tan nghal viau mai a. Hospital atang paw’n kan chhuak har hle. Chuatah awm theih reng loh le, bial lamah haw thlaksan a tul leh a. Ka thleng thla awrh tih chuan naute dam loh thu leh a nu a mangan thu min rawn hrilh leh a, ka han haw chho leh a vawi tam tak kan chiu a, a khawngaihthlak hle thlahnih chauh a la ni si a; chutah a tha deuh tihin ka haw thlaksan leh a. Ka pa cancer chemo khai a ngaih thu leh a zuam loh thu min rawn hrilh leh a ka rilru a buai hle a. A hmaa kan khai kha a zo meuh lova, thi dawnin a awm a tuna han khai lehnghal mai chu rilru a kal thui ngei mai. Rin ang ngeiin a chau em em a, biak tur reng reng a awm lo, a mu tawp mai a ni.

Bialah programme kan nei nual a, theihtawpa rawngbawl a tul lai a ni a rilru kim lo takin ka awm a. Pastor retreat a lo hun leh a, ka han haw leh a ka pa ka han hmu chu ka lainat ngei mai. Enkawl ve pawh ka chak hle thina mahse a rem thei si lo. Rilru na takin kan chhungin kan bialah chuan kan haw ta a. Ka chhuk achinah rawngbawlna lamah buaina leh hun harsa tak vauna te, politics avanga buainate kan tawng neuh neuh va(blog-ah ka ziak tawh nghe nghe). Kum a lo tawp a, Synod hmangin kan haw leh a. Ka pa chu a lo tlangval deuh va mahse a tha teh chiam chuang lo.

Kan haw thlak dawn chuan min ngai hle mai a, kan awm dun chawt a, ‘ka dam anga ka lo la zin ve ang’ a ti a, kan haw thlaksan leh ta a. Rei pawh kan la awm hmain ka pa a that loh thu kan dawng a, a ni telin a hniam tih min hrilh a. Keimahni lamah ka tel loh theih lohna tur programme kan siam teuh mai si a, ‘ka ngai hle mai, ka hmu chak’ a tih lawm lawm pawhin haw mai thei ka ni si lo. Bial chhung thawktute Retreat ka neihpui lai chuan ‘lo haw mai teh u’ an rawn ti a. Tichuan a hma thei angin thlawhna ticket-te kan la a, mahse min rawn call leh a ka pa chu a chatthla ta a. Bial Retreat programme avanga ka haw lawk thei lo chu pawi ka ti a, min ngai em em a, min hmuh a duh laia ka thleng hman lo chu na ka ti ber.

Ka pa thih zan hian kan awmnaa mizo awm ve Missionary nupa(fa nei lo) an rawn leng  a, a tuka thawh hma a tul avangin an haw thuai a. Hnam dang kara lusun chu a khawharthlak hle mai a lo ni. Pawnah ka chhuak a ka tap ru a, ka nupui fanaute hmaa han tah kha ka zak ve deuh a. Ka pa nena kan nunhlui tam tak ka chhui kir a, ka lung a leng a, dama hmuh ka beisei kha ka hmu dawn tawh si lo a. Phone-a kan inbiak hnuhnung bera ri mang tawh lova ‘ka ngai hle mai che u’ a tih kha tun thleng hian ka bengah a la ri nawn fo thin.

Kum 2009-ah Pastor puitling niin bial ka vawn vawikhatna a ni a; mahse kha kum chhung zawng kha rilru dam taka hman ka nei mumalin ka hre ta lo. Min kotu Pathianin a phal a ni ang chu harsatna kha a battalion-in a lo thleng niin ka hria. Nun suar kan dai chang hi a awm ve thin reng a.