MAK KA TIH HNUHNAWHTE

Mahni Blog-ah na na na chuan mahni chanchin ziah hi inthlahrunawm turah ka ngai lo va;  social site-te a ni lo bawk a.

Thlahrang: Thlahrang hi a awm ka ring ngai lem lo va, ‘marawhchu tunlai hian AXN channel, reality show-ah hian sapho thlahrang hi rawn pek an ching riau mai a ka en ve ziah a, mak erawh chu ka ti deuh a. A fiahtu thenkhatte chu hmeichhiate an ni a, an huai chu ka ti ru thin viau. Keima tawn takah hi chuan sawi tur ka nei ve lem lo, tum khat erawh chu ka farnute in luah, Chaltlang a mi kha an sawi hrang viau a, building chhawng thum a ni a, a chung berah Mara tlangvalho an awm a a laiah ka farnu te; a hnuai berah chhungkua an khawsa bawk a. An sawi dan chuan ‘Electric-te hi a rawn in-on tawp zel a, thawm hi a nei reng bawk a’ an ti a, mara tlangvalho pawh chuan an hre ngun hle awm e. Chu in chu tumahin an luah rei thei vak lo tihte kan hre zel a, veng chhung mi a hria chuan an tih ru hle thin a lo ni. Tichuan ka farnute awm loh hlana ka kal a lo tul ta a, zan riah ka tum nghe nghe a, mara tlangval leh a hnuaia chhungkuate erawh an lo chhuak vek a. Chu mi tlai chuan Capt.Dini of Innermost-te inah chaw ei ka tum a, min lo nghak a chu inah chuan ka inphih fai vel a. Khua a thim chhulh tawh ka hmai ka hruk lai chuan kawngka bula tui pump khawl chu a rawn in-on ta thut mai a, ka um nghal a mahse tumah chu ka hmu lo va.

Dini chuan mak a ti ve vak pawn ka hre lo, kei chu a history ka hriat nual tawh avangin mak ka ti a kawngka bulah chuan reivak lo ka’n chang ve chhin a engmah erawh a ti leh ta lo va. Kan awmna lut chho tur khan step zim em em mai, ulh si, fimkhur taka kal bek bek ngai kha a ni a. Tui pump in-on ruala ka tlan phei khan mihring ni se, step chanve pawh a tlan thla hman lovang, a ngaihna a awm lo. Tui pump on-na lah kha kawngka bul chiah a ni bawk si a lang reng a, mak hi ka ti em em mai a ni. Tun hnu phei chuan mak ka ti zual, a in neitu fate kha kha inah khan an lo thi nual tawh a, a thente chu mahni intihlumte an ni awm e. Sapho thlahrang han en hian a hranna hmunah hian mithi an lo awm tawh deuh zel a; kha in kha tuman an luah rei thei lo, a hnuah pawh. Thlahrang erawh ka ti ngam chiah lo, mahse a mak ka ti hle, mihring a nih chuan tuanran lawmman dawng mawlh mawlh tlak a ni ang.

Thereng: Sap tawng-te pawh a ang deuh e. Naupan laia Thereng man tura kan kal khan ‘Thereng aw mawngtawlh mawngtawlh, lu laman rala awm e awm e’ kan ti a, an lo tawlh thla ve zel mai bawk kha a ni a, mak ka tihnuhnawh ta alawm le. Engtinnge lo tawlh thlak nachang an hriat le, zai ri kha an lawm nge ni a, Pu Caribou-te hian Science lam tarmit atangin sawi tur in nei lo maw? Rannung ve mai an ni a, kan auh dan ang chiah khan an rawn ‘back’ thla zat zat mai a ni; music an ngaina riau nge tawng awmzia kha chu hre turah ngai lo ila an rawn tawlh thla kha mak ka ti hnuhnawh ta ber mai, kei chuan.

Motor ka khalh: Two Wheeler hi chu zir lovin ka thiam sa angah ka ngai deuh a, ka khalh nghal deuh mai a, motor hi chu ka la khawih ngai lo. Nupui ka neih hlim khan mahni khaw chhuahna  Bukpui lama han ‘show’ ve hrim hrim kha ka batah ka ruat a, kan kal dawn ta a lawm le. Kan kal dawnin kan chhungte Gypsy-kha ‘in keng duh lo’m ni?’ an ti a, thiam leh thiam loh pawh hre lo khan ‘duh e’ ka’n ti ve mai a. Tumah khalh tur kan hmuh tak lohah chuan ‘ka khalh mai ang’ ka ti a, min ring lo viau thung. Mahse thiam awm taka ka tawng avang khan kan kal ta a. Kan thianpa driver hi ka kova a gear-te ka zawt ru a.

Kan nu, ka farnute pahnih leh mi dang pakhat ka phur a kan kal ta a.  Kan kal tantirh lam chuan ka ti deuh awih awih a, mahse tih theih viau zel a; ka phurhte zingah khan motor rui thin an awm a, mahse an rui miah lo an hlauthawng deuh ni tur a ni. Bukpui kan thlen hmain kawng lakah vawi hnih ka ti thi a, mahse tluang takin kan thleng a, kan haw lam chuan ka thiam tawh hlein ka hria. Mahse tun hnu ka lo thiam tak tak deuh hnu hian ka ngaihtuah let a ka risk a lo va sang e ka ti a, ka hlau hnuhnawh ta em em mai a ni. Ka nunna chang kha ka lo risk lo va, ka farnute ka nupui leh midang – inneih tuk lawkah min vui liam tep nite hian ka han dawn thar leh vel a sakei hmu ang maiin ka hlau tial tial a; mak ka inti hnuhnawh ta hle.

Lo zawh ni: Ka college chawlh laiin ka thianpa’n ‘naktukah lo kan zo dawn a lo kal ve ta che’ a ti a, ka chak bawk a ka kal ve ta a. Ar pathum buhchiar tur leh a thenin Guiter an keng a, a thenin khuang te; a thenin playing card-leh tape recorder nen. Lo kan han thleng chu zawh tur kha tapchhak tia lek a lo zuah a mi sawmthum bawr vel khan minute rei loteah kan zo ta mai a. Chutah thlam kan han let chu no sawm bel thiau bel nga(5)-ah zu an lo bilh chu niin an han kai chhuak ta a le(h). Chawhtawlhah an han sawr dir ngut ngut mai a, a rim lah chu a hiar ham ham mai bawk si a. An sawr li lung ta maw tihah ‘duh duh tan thal theih’ an ti a an thal sup sup mai bawk a. A hmeh turin chepa leh sava rep an ken khawm kha tui hmel deuh hian an kang sen siah mai bawk a.

Tape recorder chuan C.Vansanga’n ‘Romei Zamin’ tih hla a sak kha an thlawhtir liah liah mai bawk a. A thenin Fasuar siam thar chungah Tingtang nen an lo zawm bawk a; a then hruih zawlah card dengin an kual taih bawk a; tin, an  bulah hian beltein thlit mai tur an chhawp far a. Thlam kawt zawlah a then Air gun-in an lo inthemthiam a, ka tel ve nghe nghe a. Lo mual chhaka lui tui kha thlam kawta mauphel zawm hmangin an hawtir to to mai bawk a, kha mi tum kha inbual chunga zu-in ka vawikhat hmuhna. Zu hi ka in duh ngai lo va, khami tum zet kha chuan ka van chak ve tak-ka tang laklawh tawh si min pawtluitu awm se ka tang na lo khawp ang. Thlan tla tawk chauha han thawha a tuitling rim han hriat chu a rim a thiang har mai hi a lo ni!!

Ka in ve ta miah lo va, ka in loh chhan ber nia ka hriat tak chu ‘ani pawh a rui ve leh thei tho’ min ti ang tih kha ka hlau ber. Mahse ka in leh in loh kar kha a zim mang e, engtinnge ka lo in loh theih; khami ni khan Kohhran-a in hmang thalaite pawh khan an in ve tho si a, mak ka ti hnuhnawh ta a lawm le. Mahse an ruih hlawm em avangin a sa tha zawng kha ka ei zo deuh vek a; a tawpah an insual ta luai luai a.