THU VUVUK

A za harha za harh tan chuan chet fuh vek sen a ni lo, kan pal baw pheng phung mai reng zawng anih hi. Thianten in sawi zauh zauh va han thawh ve ka’n duh deuh va; chet chhiat vang pawh a ni vek lem chuang lo ve.

Meihawl den dip

Kan naupan lain ka pa’n in hnuaiah thlasika ai tur meihawl a dah khawm a, ka u(mipa) nen miin silai zen tur an deng dip lai kan hmuh avangin  sumah kan han deng dip darh mai chuh; a den lah chu nuam em em mai leh nghal.

Vai hlau

Ka u(hmeichhia) Aizawla school kal hruai turin ka nu leh paten Bukpui khua atang min tir a, mi zin tur ka zui a; hetih lai hian pawl ruk emaw vel chauh ka ni awm e. Kan haw lam chuan ka u nen Durtlangah kan chawl chho va, motor kan chang a. Tlai dar 3 velah chauh motor kan hmuh avangin kan chhuak tlai hle. Ka u hnenah ‘khawnge kan riah ang’ ka ti a, ‘ka hre lo pu Sanga serkhan-te inah kan lut ang a, a tlai tawh em mai riak mai rawh u an tih chuan kan riak dawn nia, anih loh chuan kan kal tlang ang a Nisapuiah kan riak mai dawn nia a ti a.

Hetih lai hi Serkhan-Bagha kawng laih tantirh lai vel kha a ni a, Serkhan daiah chuan vai Labour hovin Camp an nei thluah a. Pu Sangate in kan luh chuan khua a thim chhalh tawh a mahse riak mai rawh u an lo ti ta hauh si lo, kan riak mai ang tih kan zak ve tawh si thlamuang lo tak chuan kan kal ta zel a, ke-in Serkhan atang Bukpui kal kan tum a ni; Nisapuiah riak pheiin. Labour Camp kan thlen dawn chuan ka u chu a khur ru deuh tawh a, vai-ho a hlauh em avang chuan a hlauhna chuan kei pawh min kaia  ka zam tan tawh. A chang leh ‘I aw tithum rawh’ a ti a, aw thum lo chi nih mah naklaiin a har hle hian ka hria a. Chutah ‘inti-lian rawh’ a ti leh a hei kher hi chu a har ka ti zual sauh. A hnunga a kal leh ‘I muang’ min ti a, a hmaa ka kal leh ‘I kal chak’ min ti bawk si, hahthlak tak a ni. Ka hlauh tawh em avang chuan hriamhrei ngaihtuah tulin ka hre ta a, kalkawnga hmawlh zum chu ka’n chhar ru zauh va mahse a tawi lutuk hian ka hre leh ka paih a lungtum ka chhar ta zawk a, ka kekawrah chuan ka ak ta a. Lungtum kutbawr ai lian aka kal chak lah chu a har em em mai lehnghal.

Khua kan thlen dawn chuan kan rilru pawh a muang tan, mahse kawng kawiah tak mai chuan vai pali hi thimthamah an rawn lang thut mai, ka u chu a te tuarh a min rawn bawh a; pumpelh kawng zim lai anih avangin ka phu nasa lutuk chu kawng thlangah ka lum ta a, lungtum phawrh chu sawi loh ka malpui a nawt pilh a a thip vung vung a, artui chawhmeh atana kan lei, ka ken chu ka vaw keh vek bawk a kawng thlanga ka tan chhung zawng chuan ka u chu a te tuarh tuarh a, vai-ho chuan a theih angin an lo hnem a.

Nula awmah ka bei

College kan kal laiin nikhat chu ka phak tawka hun ropui ka tawnga ka hlim em em mai a, college-ah poetry inphuahsiaknaah lawmman pakhatna(English) leh pahnihna(mizo) ka la a. Tin, KTP-ho Essay inziahsiakna(open)ah lawmman ka la bawk a; Nehu silver Jub.lawmna Poetry inphuahsiaknaah lawmman ka la ve hlauh bawk a chu lo chu pakhat ka la bawk ka hre tawh lo; panga a ni tih erawh ka hria. Nikhata thil thleng anih avangin hlim takin Chanmari West lamah step-ah ka chhuk a ka kal nui vur vur lo chauh. ‘Sawm thah niah pawh vawi khat lungngaih a awm chawk’ tih a ni a ka lo hawi sang ta lutuk nge ni step ka rap pelha leh-hma lamah ka eu thla awrh a ka inchhuih zui a ka tlan chak zual sauh a; chutah ka lam pana lo chho nula pakhat chu ka su thla a, te tuarh chungin mi varanda-ah ka nawr bet a a awmah ka bei ta chat mai a kan hlau dun kher mai. Zepnak emaw, bei naran pawh ka ni lo, ka ke zungpui erawh a dam har na ngiang mai.

Thing ka kit

Ka tlangval ve uaih tawh, ka pa nen tuikhuah kam kan vat a, thing pathum ka kih tawh pawhin an la tlu thei lo va ka ning hle. Kan chhun chawlh lai chuan engin nge min mawlh ka hre lo ka thingkih sa pakhatah chuan ka han lawn a, ka han tuk thla a. Ka tukthla tam hman vak lo, a tanna ber zar ka han sat chat chu le thawl hawk hian ka hria a, kan tlu thla ta luah luah mai nih chu. Ka tlakna lam tur hnung chhawnin kan tlu thla a, ka au ruai ruai bawk a ka sah chhumna bul lam chuan ka nakah a lo do va ka hnang ta a.

Ka pa kha a lo chhuk lawk lo va, a hnua a sawi leh danin ka thih a ringa min  pawh hreh khawp hi a lo ni. Ka thawm a hriat chuan a lo tlan thla a, min chum ta a hnang tak takah chuan inchum hi a lo tha lo min chum hlum tep zawk a ni. Mahni awm awmin awm ila thawk theih dan a awm zawk. Ka ngaihtuah nawn apiang hian ka inthiam thei lo ka han lawn hrim hrim kha a mak tawh hrim hrim a ni.

A ruala sermon

Tumkhat chu Aizawl, Zemabawk-ah thu ka sawi a; ka thu sawi lai chuan nu pakhat chhul lam tha lo hi a lo lut a Lectern-ah chuan thu a a rawn sawi ve ta mai a. Anin Lectern-ah keiin pulpitah ka bei dun ta nih chu. Nu pakhat a lo kal a rawn hruai chhuah a tum a, kei chu min rawn kawk a ‘hruai chhuak ru keiman ka sawi dawn’ a ti a Pathian thu phei chu a sawi chuang lo va. Kan han nui tlang leh te te a bul kan tan tha leh a, a lo lut leh ang tih hlau reng rengin ka tumtla.

Thusawi tur ka hai

Tumkhat chu KTP Branch pakhat hian thusawi turin min sawm a, aw ka lo pawh a; mahse a hun a lo thlen chuan ka manghilh ta anih chu. Kei lah Branch dang variety programme-ah Judge-ah ka lo tang a. Min rawn call-a chuta hrehawm ka ti ta lutuk chuan ka thil endikah pawh rilru pe thei reng reng lovin ka awm leh si, hrehawm ngei mai.

Septic tank tui kan tlan.

Mathurapur kan awm laiin tui a al thin em avangin ruah tui khawlna tuizem kan nei a, chu tui chu kan roh ve hle thin. A chan ve a pel a, kan ui tulh tulh a, in atan chauh kan hmang a, mahse a chhuat atanga khap hnih velah chuan a phai thei ta reng reng lo mai a. Kan han bel chiang a, kan ekin pipe(pipe ti ila, cement a siam) chu a lo phui lo va tuizem nen a inhnek avangin tuizem lah a lo phui chuang bawk si lo va a lo lut thin chu niin, kan han hre zet chu kan lo ring rei tawh hle dawn a lo ni a, zia lo tak a ni.

Tawk hrih teh se a…