INVAUNA TENAWM

Lehkha ka dawng

Dt.3.February.2010 a ni a, kan chhungkua mai bakah kan awmna hmuna mizo awm ve chhun kan missionary nurse-te nupa an lo leng a, hlim takin thingpui in pahin kan ti ti a. Chutia hlim taka kan awm lai chuan dakpu a lo langa lehkha thawn min rawn pe a, ka han hawn nak chuan RSS-inti hian min rawn vau hi a lo ni a. Kan khawhar teh reng nen vau tlak pawh kan ni mawlh lo asin maw le.

Thil awm dan

Kan awmna hmun hi Mathurapur a ni a, Kolkata atang 55km vel a ni a. Pastor tan office dawr vel a harsat avangin leh veivahna a buaithlak deuh avangin Synod 2009 chuan Baruipur Kolkata-144 a awm turin min lo ti zo chiah kha a ni a. Baruipur-ah in luah tur kan zawng mek a nitin kan thawk phei a; chutianga kan awm lai mek chuan Baruipur atang lehkha lo kalin ‘I rawngbawlna hi kan duh lo, Kristiante hnathawh hi kan duh lo reng reng; i rawn kal tur hi kan hre har a kan rawn hrilh thei lawk lo che a, tu pawhin in luah tur an pe thei che-an thu a ni, mahse kan dodal tlat dawn; mi fing tak i ni(min han fak leh rih a) a, i ngam leh rawn kal rawh’ min rawn ti a ni. Note an rawn siam belh a ‘In chhungkua ngaihtuah chungin thutlukna siam la tichuan kan lo hmuak ang che’ tih a ni; a no lo khawp mai.

Dawng lo ang hmiahin in luah tur kan zawng reng a, dik tak chuan ka thengthawnga luhtir ka tum lo hle, mahse chhungkua an rawn sawi tel khan ka rilru chu a kap deuh a. Ka nupui fanauten an tawrh ve kher kha ka chhia leh tha hriatna hian a phal thei lo a ni. Chu mawlh chuan ka mut a titui lo va, mahse engti kawng pawhin thulh thei kan ni lo a tul a nih chuan khawi hmun pawh kan pan tur a ni reng a.

Ka man chhuak

Khatia min rawn vautu kha tu dang ni lovin ka(n) bial chhunga kan chhawr mek kan Evangelist, a hnam mi kan rawih ngei kha a lo ni a. Amah hi mi huaisen lo tak naupang chhe rilru pu thin, sual lem lo, mahse intifing ru fu si hi a ni a. Ka bialah hian thawktu keimah tiamin 29 kan awm lai a ni a, Bialah chuan a ngah ber ka ni(Kolkata Field-ah). Nupui nei tawh a nupui pawh kan thawktu tho a ni a, fa erawh khatih lai khan an la nei lo. Kristian an nih avangin an pahnih(nupa) hian an chhungten an titha vak lo nghe nghe a ni awm e. An inneih khan a mipa thianah kan Evangelist tho(ka awm hmaa thawk thin) a tang a, chu chuan ‘keimah tih a ni e’ a ti a, mahse ka pawm chuang lo; a ni lo chiang bawk a, an ban a hlauh avangin a thiante tan a inpumpek a ni ber. An sawi dan chuan Baruipur-a ka awm chuan ka kiangah Mathurapur-a kan Evangelist hi hruai zel ka tum si a, a thik deuh a ni. A thawh hlawk loh em avangin a awmna Fellowship kharah ka vau tawh a, khar chuan Mathurapur-ah a awm dawn si a, heta awm hi an nupain an hreh bawk. Baruipur-a ka insawn loh kha an tan chuan a hnuk hnai ber kha a ni a, vau zam min rawn tum a ni. Mathurapur-ah tunhmain a lo awm tawh a, a hreh tawh a ni. Engamah hmain Mathurapur-a awm loh leh Baruipur-a kal ve kha lehkhain min rawn dil ve ringawt tawh bawk. An thu hi invauna tur atan a lian lem lo, mahse amah hi a tam lo ve a ni ber; BA lai chu a ni ve.

Chhuichhuah dan

1)Pathian tanpuina liau liau a ni; kan tawngtai reng thin. Mihring heti zozai kara chhui tur chuan ka huphurh ve khawp mai.

2) Sherlock Holmes-a bu kan chhiarah ‘thil ni thei lo zawng hi paih ila, ni thei a lo chhuak’ tih formula hmangin ka chhui a ni. Police rawih kha a finthlak teh chiam loh va, kan report lo hrim hrim.

3) Envelop kawma address an rawn ziah kha a chiang lutuk mah mah a, chuvangin min hre chiangtu lo tan a tih theih lo Opposite tih te, Near tihte thlengin a awm. Tin, RSS tak tak chu ni se tawngkain min vau hmasa ang a, letter head an rawn hmang bawk ang.

4) Nupui fanau ka nei a, ka hmangaih hle tih an hriat avangin an rawn sawi lang kher, RSS hovin an rawn sawi lang lo vang. Tin, a hawrawp hi khawiah emaw ka hmu tawh. Heng hmang hian kan thawktu Field pum(mi za chuang) a mal malin ka ngaihtuah a, kan bial chhungah ka sawr zim a ka naute hnena tawngkam ka hman tawh ka hriat theih zawng zawng ka ngaihtuah let a; hun kal tawh a lehkha ziak awm tawh zawng ka keu chhuak vek a, minute bu hlui ka chhiar tlut tlut bawk; ka var tan, he pa hian kut ziak chi thum a lo nei.

5) Dakin Seal an lo pek ni hi 25 January a ni a, ziahni hi 23^rd January tih a ni; chuti chu  23 January emaw 24-ah emaw a awmna atang Baruipur-ah lehkha thlak tura va kal a ngai tihna, Seal hi Baruipur seal a ni tlat. Ka ko a, ‘23 nge 24 January ka hre chiah tawh lo Baruipur-ah khan enge i tih’ ka ti a,  ‘member ka tlawh’ a ti a-sawtah member a nei lo. Ka hual zim sawt hle.

6) Lehkha min thawn hi English-in a rawn ziak a, word thenkhat ziah sual(spelling mistake) a awm a, a lan danah tihpalh aiin hriat loh vang a ang zawk. Ka kova thu ka phuahchawpa(dawt varte pawh ka sawi) ‘nangin lo ziak la ka lo sawi ang a, kan thawn dawn nia’ ka ti a, khang thumal ziah sual zawng zawng huam thei turin thu ka phuah kual a a dik loh ngaiin a dik lo leh fai vek; a awk chiang tawkin ka hria.

7) Ni dang a ang lo ui ei ru ang mai a khup zul zul tlata hriatna ka nei.

Indawpna

Chiang tawka ka hriat avangin Biakin chhungah ka ko va, ‘I lehkhathawn ka lo hmu a’ ka ti a, a hre lo der vel a. Ka vau va, ‘police hnena report a sum tam tak chawi emaw lungin tan nge i duh inpuan mai i hna i chan bawk ang’ ka ti a, a la pha a. ‘Kan inkawmna ka titawp police tawk turin inbuatsaih rawh’ ka ti a, ka chhui dan zawng zawng ka sawi a, a meng awn awn a. A inpuang ta a, ka thawhawk chuang lo, hre saa ka indah avangin.

A hnu leh

Kan ban chuang lo, a la thawk reng. Kan ngaihtuah a,  ban duh ber tur khan ban chu ka phal lo tlat; ‘ban ila engmah a ni lovang ngaidam ila a hma aiin a tha ang’ ka ti a, chu chu kan pu ngaihdan pawh a lo ni ve a, kan ban lo-duh ila kan ban theih a ni. A tha ta em em mai a, mo thar tha hi ka chan deuh va, ring thar a siam ta chur chur a, fa duhawm tak an nei ta bawk a, a fel ber a ni chho ta; ka en hrang lo va mi a zah a, ka thu a zawm tha em em a, hmasawn ber leh thawhhlawk berah ka sawi ta reng mai anih hi. Pathianin zam lo leh chhui thei tura min siam avangin leh ama nun ngei a kawihhersak avangin ka lawm em em a ni.