NUNHLUI NGAIHAWM(auld lang syne)

Kan nunin  a zawh leihlawnah hian kan rahchin apiang mai hi a inphet zat zat mai si a, ngaihtuah leta lunglen chauh mai lo chu chan reng kan nei ta lo. Hmasawn kan tum ata langin a hlui ngai reng rengin a thar kan um a, buai hreh em em chungin min tibuai zual turin kan hriat belh zel zawng anih hi. Kan nun inthen velah hian lungleng hman mang lo va kan phi buai chang a tam, kan duh loh lama kaih kan nih chang lah chhiarsen a ni ta lo, keimahni kam ngei thangah kan awk tawh a ni. Mahse awk tang reng pawh ni mahila chhungrilah hian chul ve thei lo nunhlui ngaihawm kha a cham reng a, nghilh ni reng reng a awm thei ta lo. Hla phuah thiamten ‘Kan hla thlum ber berte hi kan lungngaih lai min hriattirtu an ni’ tiin dik deuhin an lo sawi tawh a, chutiang chiah chuan kan nunhlui ngaihawm ber berte hi kan nuna atthlak leh nuihzatthlak te, zahthlak leh lungngaihthlak laite kha an lo ni.

Kan chung Thlapui pawh khi a la ngai reng; kawlah a rawn inchhawnga lunglen  rawn kaihthawh a la thulh lo, a chekawi arsite lah theihnghilh awm miah lovin min la hlui reng a;  tuktina chhuak Ni lah a la dai lo a sat ngaiin a la sa reng. Kumpuisula  hun inher chhuak turte chu a pangngaitein an la her chhuak a, tlangtin mualtin leh kawr ruamte chu an hmunah an la bawk tlang far ;  mahse kei leh ka thiante hi kan va dang ta em! Ka dam rualpui, ka veh ka veh thin savate pawh kha khawnge an awm tak ang le, Sairawkherh kak atana ka lak hual Sehawr zarte kha engtiat tak ni tawh ang maw le? Ka thangchep kamna, Chepa kawngtum kha a la kaw phat ang em le? Ka rilru mitthlah chuan a la kaw reng.  Tawlailir ke atana ka hual Fartuah kung khan ka hual a ni tih a la hria ang em?  Zawhna a va tam em!! Tawlailir za atana ka sah loh zawk a phirpui kha a lian tawh viau ang nge a tlukar daih tawh zawk?  Khiang thing hi a la me rengin Vawmbal hnaiin thak a la siam thei em le? Thakpui leh Zawngkangthai hian mi a la kang theiin Chhimhruk hi ka la haw tho ang em le? Han fiah leh thei ila aw! Thenrual thaten Gas thuk mawi tak leh electric tha chakna hmanga bel mawi tak chhunga an lum thingpui, Australia Bawng chi tha mi hnute ngeia an pawt, Solomona lal no ang maia mawia thingpui min han han hlui chang pawh hian ram palailenga mautheia thingpui lum Hnahkhar tang ro alha hliau, Pu Ranga kurtai nen a sena in kha ka la thlang zawk ka ti.  Mi Car mawi leh man tam chhunga chuana hawi hawi ai chuan theih ni se tawlailira kan khaw dawrkai fapa kha han nawr leh ka va’n chak em. Sikul chawlhlai takte kha aw!

Ni, hun azawnga in nang khawm fuh ber berte chu, sikul chawlh lai leh sava thau lai,  krismas leh kum thar, tlangsam par leh thlasikte hi an ni lo vem ni? Ni dangah pawh kan lo sawh fo tawh na thin ko pangah chuan bungbu kutin hlum kan han sawk ngei a, inthemthiamna tur nen lam hrual kepin kan han pho tuarh mai thin kha nia le; fur laia kan bun chhiat savun pheikhawk lei ngei mai kha sairawkherh phan atan kan han tan leh hmawk mai a, chutah ram palailenga a tam thei ang ber tuhrik kai turin kan chhuak ta thin kha nia. Kal pahin sikul kawnga hnim buk pali-nga kha kan han bawh eng thla uau mai bawk a. Sikul tual phula chip leh lailen nupa  veha kan han kun phei vel te kha aw...thlir leh hi ka chak thin. Zo lentu hnuaiah lung lem nei lo khan 'khawnge Thingvawkpui, khawnge Kelbuh..Thingthiang' kan hriatna hmun apiang in 'share' chung khan kawr tin kanin mual tin kan hrut thin kha ni a. Chung lam thing zar hawi ila ' khi khi sairawkherh kak tur kan  ti a, hnuai lamah lah ' saw saw tawlailir za tur, a zapui tur' kan ti a. A changin vazar rual kan fin a, a changin vate rualin min rawn fin ve bawk a. Vahrit ram tla kan thawnna piah a Thingvawngpui hnuaiah chuan dai theuin sahdal thang kan han kam a, kam lai a ramparva thlawk ri pharh thin chuan en hun min tinghakhlel zual thin a. Beai erawh chu vahrit bual kan hmuh hun atan kan khek thin. Kawr kama changel hnah leh a hnuaia tumbu chu engemaw chen inthemthiam nana kan hman hnuin kamramah thingsemimte chu kan han chhar leh lawp lawp bawk a.Hlim takin kan vak vel a, kan au va, kan khek a, kan nui a, kan kuk bawk thin; ral lehlama thian dang kalte nen kan inchhawn a a tawp khar talh kan tum thin. Mahse haw har thei kan ni lo, zanin hi Mc Gyver chhuah zan a ni tlat.

Sava perh tla kher lo mahila kan hlawk tho, krismas hnah lakna tur kan hual miau a. Krismas hi khawiah nge an nghah leh ang le.. chu chu a pawimawh fo. Thingfakin inlem kan siam leh ngei awm si a. Ni e, sang takin thingfak kan rem ang a, a chhungah kan thu leh ang chu...tah chuan tlaivar kan tum leh ngei awm si a. Chhungte sawi dan chuan vawk kan talh ang a, hmarcha kan hralh that bawk chuan puanpheikhawk tha tawk, T-saat leh pistol lem kah tak tak theih kan lei dawn. Mahse riruah hlauhthawnna deuh la awm chu puanpheikhawk lei lo hian sikul-a rin nghal tur min lei leh palh ang tih hi a la ni cheu. Engpawhnise eng zawng a thawl, zan a lo ni a lehkha zir ngai lo, zing a lo ni a, sikul kal ngai bawk si lo. Tui chawi erawh hna kal lai a ni. Mahse thil hrehawm a ni lo, sava veh pah a ni leh mai.

Thla en zana tualchhuak tingtang tar lam nen a, ‘lung ka mawl em mai’ kan tih lai khan kan lo mawl tak tak a, mahse a va nuam si. Kan lung a awi a, kan chan tawk kan hlimpui thin. Nun kha kan tan a par a, a vul chiai thin. Ngaihvarungthawn kan han nei a, kawnga kan han tawk tur ringawt kan ur nasat ziate kha, lehkhathawn kilthum nei ngei maia thleh inchibai paha kan han inhlan zauhte kha tu hmuh chhuah nge? Envelope hian lehkhathawn hlutna a lo keng hlei nem maw le…

Thil chhuak thar han awh ngawih ngawih tur a awm lo kha kan hlimna siamtu pakhat a ni. Kan neih a inrualkhai a, kan tui zawng a inhmu a, kan tlatna mual a inang za thin. Engkim mai kha chhnungte thawhchhuah atanga lei anih avangin kan ren lo. Tun hnua chi leh zel pawh mahni puala kan han lei thlap thlap takah chuan leh pawnchhia tur takngial pawh intodelh a lo tul takah chuan min delhtu hi a rih dan a dang ta hle  mai a lo ni.  Sarep rawh rukte kha a hmui dan a va dang em, a hmin that leh that loh lam a ni lo hrawkah khan engkim mai kha a tui a, tuichen nikhua phei chuan kan pai apiang mai kha intihtheihpui tham vek a ni thin.  Chhun kan hlimpuia zan kha nuam kan ti thin. Aw khanglai hun tak kha aw… heng Rel kiu ruai ruai leh motor ri hum hum ai hian tawlailir tlan ri ham ham mai han ngaihthlak ka va’n chak leh em. Choak ak tuar tuar ai chuan zo sava chhawlhring, Tukhumvilik leh Kawlrit hramte kha a lo va mawi em!

Ka rawn rawn tlawh leh ang che NUNHLUI NGAIHAWM.