A NUAM CHIAH LO

Presbyterian kohhran Pastor ka ni a, kum 2008 Synod Inkhawmpui khan Kolkata Mission Field-a Mathurapur Bial vawng turin min ruat a, hetih lai hian fapa pakhat ka nei a kan chhungin(kan nula nen)kan chhuk thla a. Pastor sawi takah han peng lawk ila, ka hming ang chiah Pastor ve tho a awm a, amah chu Mizoram Baptist kohhran Pastor, Rev.P.C.Lalropuia, AICS-a BD zir mek hi a ni. Kan hming dah dan leh kan nihna a inan em avangin tum khat chu Evening Post News Paper-ah hian article a ziak a, ka thianten min rawn SMS sap sap nghe nghe. Han ziak zel teh se, mi para lo chuai ai chuan mi kuhmuma lo par hi ka thlang zawk. Mathurapur Bial hi tunah chuan Baruipur Bial a ni tawh a, keini pawh Baruipur Kol-144-ah hian kan insawn phei tawh a, tun tumah hian Mathurapur kan awm lai thil thleng han sawi ka’n tum a ni.

Tlai khat, Inrinni tlai chu kan thenawmte hi an inhau chiam mai a, ‘an va inhau peih e’ kan ti mai a. A tuk Pathian niah chuan Bial fang turin zing dar 8 velah kan evangelist(native) nen kan chhuak a, kan chhuah dawn thleng chuan an la inhau tui hle. Ngaihthat lohna pawh nei lem lo chuan kan kal a, kan compound chhungah  khatih lai khan Missionary Nurse-te nupa leh an fa nula leh kan Evangelist leh a nu, kan chhungkua nen kan awm a; In 3 bakah Biakin a ding bawk . Kan bial fanna hi ka Quarters atang Auto Rickshaw-in darkar 2 dawn kal a ni a. Kan Inkhawm lai chuan call ka dawng a(vibrate hian ka dah mai thin) ka han en chuan kan nu a lo ni a, ka hmet hlum lehnghal a. A lo kal leh a, kan Nurse pasalin min rawn call thung, mahse ka hmet hlum leh. Ka hmeh hlum zel hnuah pawh chuan a lo kal zel mai si a, thil dik lo a awm ani ang ka ti a, remchang insiamin ka lo chhang ta a, ‘i lo haw vat a tul’ an rawn ti a.

Thil awm dan

Khatia zan khuaa an lo inhnial nachhan kha Party politics thil a lo ni a. Kan veng club(YMA ang deuh hian khawtin hian club an nei)CPI(M) party thlawptute chuan mandir bulah club house sak an lo tum a, chu chu lehlam Trinamool Congress lam chuan an duh lo va an inhnial hi a lo ni a. Chutianga an buai lai karah chuan CPM lam chuan ban an han phun dawn ta mai a, an ni lehlam (TMC)chuan an lo phal awkawng lo mai chu niin hriamhrei nen an rawn thawk chhuak ta a. Chutia hriamhrei nen meuha rawn thawk chhuak ta chu CPM lam mi pakhat chuan TMC party mi leh sa pakhat chu a lo talh ta mai a; boruak chu rampui mau hmun vahchap kang ang maiin a alh chhuak ta a ni. In an inhalsak a, an insawisa bawk a, haw hawin an auva Trinamool Congress(TMC) lam chuan rapthlak thei ang berin phuba an la a ni ber mai.

Heng an buaina zawng zawngah hian kangkai tur kan nih ve hauh loh laiin CPM thalai hruaitu, an sawisak hmabak kha tap chungin kan compound chhungah a rawn tlan lut chu lo niin; kan evangelist-te inah chuan bihruk a tum a, mahse ka evangelist nen kan chhuah bo avangin a nu chuan  Nurse Quarters-a biru turin a lo rawn a, tichuan an khumhnuaiah an phal lo chung a va tawm ta a. Chu veleh kan evangelist nu chuan Gatepui chu va kharin a kalh zui a, hei hi thil awm lo pawh a ni hran lo himna duha rawn vak lut hi a thiannu makpa a ni bawk si a. Vanduaithlak takin a rawn tlan lut lai hi mi thenkhatin an lo hmu ru chu niin mipui pawisak nei lova tleh dul dul chuan kan compound lam an rawn kawk ta a ni. Mahse kan Gatepui chu a inkalh tlat avangin tumah an lut thei lo va, pawn lam atangin ‘rawn hawng rawh u in rawn hawn loh chuan nangmahnin in tuar ang’ tiin an rawn au chiam chiam a; hetih lai vel tak hi min rawn call an tum lai kha a lo ni a, kei lah chuan ka lo hmet hlum hmiah hmiah mai bawk si.

Hmanhmawh a awl

Phone call ka’n chhang chu leh ‘engtin nge kan tih dawn?’ an rawn ti sek sek tawh mai si. Thil awm dan chu tha lo riauin ka hria a, ka mitthlaah ka fapa thla 7 mi leh a nu buai dan tur chu a lo lang nghal a, a nuam chu ka ti chiah lo. Hnampui mawl laklawh mawl zia hi ka hre tawh a, heng mite sakhua chu politics hi a ni a, an pathian chu pawisa ka ti fo reng a. Hawng lo mahse Gate an chhu chhia ang a, thinrim eng phiarin an lut dawn tih ka hmuh lawk reng avangin, ‘va hawng ula anmahnin duh leh rawn la chhuak rawh se’ ka va ti a. Inkhawm kan han nei chu hemi ni ber kher hian Baptisma chantir tur mi 25 lai mai an awm a; chumi hnuah Lalpa Zanriah Sacrament buatsaih kan la tum bawk si, rilru a hmanhmawh duh ang reng khawp mai. Kan ti deuh sawk sawk a a rang thei ang berin Auto Rickshaw kan la a, kan tlan ta char char a, tih theih dang kan nei lo tawngtai chauh mai lo chu.

Kan tlan pah chuan kan inbe reng a, kan nu hnenah chuan Nuse Quarters-a chhuk ve turin ka hrilh a; gate an va hawn chuan mi tam tak an rawn tlan lut a, Biakin chhung leh compound vel chu uluk takin an dap a. Nurse Quarters-ah lutin an va zawng kual bawk a, an hmu mai lo lehnghal. An han hmuh meuh chuan khum hnuai atang chuan an hnuk chhuak a, kan Nurse-te bed roomah chuan an sawisa ta a. An sawisakna lamah khum leh bungrua pawh a chhe nual a, thisen pawh a baw hnem hle. ‘Engatinge in rawn hawn duh loh, an lam tang em ni in nih?’ tih vel chu an tawng duh dan a ni a, kan nurse-te pawh an kawk deuh sawk sawk a ni awm e. Heng hun hi thleng reng thei a nih avangin min tanpuitu atan thenawm khawvengte hi ka lo be tha fo reng a, rethei te te an ni a buhfai leh ei tur dang, damdawi ilote a thlawna kan sem chang chuan ka telh ve hram hram thin a; hemi tum pawh hian an hlu hle a ni. Amaherawhchu kan rawngbawlna avanga mit lo kham deuhho khan remchangah an la ang tih kha ka hlau ru deuh ber.

Engemaw chen kan tlan hnu chuan kan thleng dawn ta a, kan in lan theihna chinah chuan min lo dang a, kan kal zel an phal ta hauh lo. ‘In kal chuan an lo khawih ang che u, mi tam tak an thi tawh hetah awm hrih rawh u’ an ti a, ka pawm chiah lem lo na a, kan khawmuang deuh va. Kan in chu ka’n thlir a a kawt velah an au dur dur mai bawk a, a sir velah chuan an in hal tawh ho chu a khu vung vung hlawm mai bawk a. Ka ngaihtuah a ‘sawtah thlaphangin an awm a, indantir reng hi a dik lo’ ka ti a, kan kal lui ta a; engmah kan ti lo, anni lah an thla a lo muang sawt a. Chutih lai tak chuan kan in lam pan chuan an rawn tlan phei leh a, an au leh ta dur dur a. Kan thenawm chiaha in tha ve tak chu an rawn hal leh ta hluah mai a, a nuam chiah lo. Mak ve deuh chu he thil thlengah hian zamna emaw han hlauh em emna ka nei hran lo, mi huaisen ka ni miah lo va mahse dawih anga min sawi hi ka duh ngai lo.

Kolkataah kan phei

Kan hotute nen kan sawihova politics thil a ni a, tul lova inkankai a hlauhawm bawk a Kolkata lama phei hrih mai chu kan ti ta a, a lo fuh hle. Chuti ni lo se kar khat ngawt chhun leh zan an curfew-a, mamawh lamna hun tur takngial pawh kan nei dawn lo hi a lo ni. Kan han awm vang vang a, mahse Pathian ni a lo thlen chuan Biakin hawn lohva awm tur chu ka ngai ngam lo va, va kal leh ka tum ta a. Curfew lai mah ni se kal theih turah ka ngai a,  thiante erawh chuan kal lo turin min ti deuh hlawm a. Mahse ka rilruah Paula’n ‘Jerusalemah hian phuar chang ka huam lo va, thih pawh ka huam asin’ a tih kha a lo lang a, ka sawi chhuak nghe nghe a, min zui ta hlawm a. Ka rilru chhungril berah chuan Politics vanga thih kha ka duh teuh lo martar tak takah pawh ka inchhiar lovang mahse Biakina ka kal vanga ka thih chuan a dang dawn ka ti ve deuh a ni.

He thil thleng hi a chang chuan ka ngaihtuah chhuak leh thin a, a hun lai khan hlauhawm han tih chiam tur ni lo mahse a nuam chiah lo.