NGAIHTUAH A NGAI E

Thlam bang nghenga Nehru-a kan rel lai khan tu khawkhain va hre suh; chu achhapah tu thengthawngah a luh kan hre lo;  tunah zawng  kan  kut zungchal vawikhat phut hian kan ngaihtuahna dum leh varte chu khawvel a den chhuahtir nghal a, thuthmun kan rem fel hma hauhin hming mak pui puiin min kil nghal tuau mai a nih hi.

Rawlthar nih lai khan mut hmunah rizai kherh chuatin ‘naktuk zanah chuan chuan ka sawi tawh hrim hrim ang’ tia thinlung committee thutlukna  kan siam hnuah pawh, kan D ruk-ite kawngkhar kik tur ringawt pawhin zahfakah lu em chhum suh kan ti tan nghal a; an tapzawla lungthu tlawha an chhemthei han sum meuh kha chuan kan inbuatsaihna te kha chu tui hum ang maiin a thamral leh thin. Tunah zawng  hmaizah tur awm ta hek lo le, muangleia duhtawkin kan han phuah kual a, edit leh vek hnuah zak map lovin kan thawn hem hem zel mai tawh anih hi.

Chu khawvel dawhsanah chuan ka pawnto va, thu hawng leh kal lam khun taka ngaihtuah chuang miah lo hian min fuihpawrhtu an awm phawt chuan a tuartu ber ang hrim hian kan khek chiam chiam a. Ram, khawtlang leh kohhran inrelbawlnaa kan lung si lo deuh a awmin min vuipui turin midang phungbawmah kan sawm ta dahrual a, a rana rana lova min thlawp duh lah bus nam lum tham zet hi chu an lo awm ve leh mai dahrawl nen. Hmaizah tur awm tawh hek lo...

Thil tha tur nia miin an hriat leh hma an lak tha kan tih ve loh vanga kan  diriam chiam chiam hian kan lo tha lo zawk deuh nge nge tih hi hringnun kalphung pangngai a ni. Mi thain a thil tha hmuh, la pawm duh ve lotute a hnehna hmanrua chu thil tha bawk hi a ni. He media huaisarna khawvelah hian vantlangin tha nia kan hriat duh lotute au thawm hi a ring awl hle. Vaiho hian kirton an nei a, zan khuaten an zai thin a an thawmah chuan an tam hmel hle thin a, va en ila pahnih khat bak an lo ni ngai lo. Thil tha duh lova, tha ve dang zuar zuartute hi mi tam an ni lem lo, an bengchheng thung.

Individualism thlipui a lo tleh a, a rawn hmuh mawh hmasak ber chu collective responsibility hi a ni. Chutih laiin kohhran, khawtlang leh ram chu collective responsibility-in a lo inhung khap mai bawk si a. Hmana chhungkuaa kan duh loh zawng zawitea kan inhrilhruk thin kha mi huaisar intiin kutzungchalin an rawn kawk ta sawk sawk mai a, fing takin mipui min inhnialtir ta hlawm a nih hi. Kohhran leh politics chu a tuar nasa berah an tang zui ta reng a, khawngaihthlakin.

Kohhran hi Pathian ta ani a, a enkawltu mihringte hi mi famkim lo awm khawm kan ni tih hi hre turin eng degree mah lak a ngai hauh lo. Khuai rau ang a ni a, a then hnung lam hawia thlawh chang a awm a,a then hma lam an pan chang a awm. Chutiang chuan chatuan ram lam panin kan in tial tual chho ve mek zel a, siamthat ngai chu rilru thianghlim tak leh dawhthei taka siamthat chi a ni, pawl dang a ang lo. A neitu a thianghlim avangin he kohhran pawh hi a thianghlim a, rilru thianghlim tak nen lo chuan sawisel chi pawh a ni lo. Finna, thiamna leh changkanna hmachhuana kohhran sawisel hi mahni lu chunga meiling chhehkhawlna ani a, kan rilru chu Pathianin a hria.

Media thang mek leh finna sang chho mekah hian pum taka kan inhrualmum chhoh thiam loh chuan kan pherh chhe hle thei. Freedom of speech kan neih vang ni miah lo, media hmanga sawi a remchan zawk vang mai hian mitmei veng lo leka tal chiam a awl dawn hle. Midang zai ngaia thurawn pek leh fin chhuah hi a tlo hle si a...ngaihtuah a ngai e.