KA HLAU HNUHNAWH

Dt.29.1.2011. Nimin piah chu ka va’n  chesual teuh em ve aw! Ka hun a la thleng lo a ka thi lo a ni hrim chauh mai. Kawngpui zau zal nuam em em maiah bike ka khalh a, ka tlan chak ber pawl a la ni bawk.  Ka hmaa Rev.P.S.Daniel-a tlan chu ka um a, kawng chin hria anih avangin fa hrawk chawm speed-a tlan thin kha hawklak speed-in 90km/hr-in ka’n tlan anih kha. Tum hnihkhat chu Pu Daniel-a hi ka lo um tawh a, min lo nghak anih loh chuan ka umpha ngai lo reng a ni. Chu chu thil tawp dan a ni mai lo, Traffic red light a lo nih chuan kan ding za a, kan ti ti vel a, chu hmun chu ka la chian loh em avangin min kawhhmuh vel bawk.

Tin, heti hi a ni a, Traffic light a hrin ve leh rang mangkhengin kan inum leh ta a hetah chiah hian a ni he thil lo thlen dan chu. Ka speed-in ka tlan chak ngam chin a han thlen lai vel chuan ka tek chuai hian ka hria a, engemaw sut neiin ka inhre bawk a, mahse engmah ka hmu lo. Electric current-in min man ni hian ka hria a, ka kut vei lam hnung chu a thip deuh veng veng bawk a, ka eu deuh awrh a, ka bike khalh mek chu ka thunun hman lo teuh kher mai. Ka jacket hak ban vei lam chu a ri deuh hrup mai bawk a ka suangtuahna kal vel ah chuan – mawltakin ‘electric current hi boruakah a cham thei dawn’ nite hian ka’n dawn vel hman a. Ka bike khalh lai chu kan tizawi a ka kut vei lam hnung thip deuh veng veng chu ka’n en a, ka kutkawr bun chu a lo kak hlawk a a lo thi ser ser mai bawk a. ‘Hm, rannung lo thlawkin min su a, min chilh zui anih hi’ ka ti a, thutlukna chu ka siam lehnghal vat a. Ka Jacket chhungahte reu reu a lut ang a ka ti a ka ban ding lam chuan ka’n indap deuh chung chung bawk a.

Tin, heti hi a ni a, piah deuhah chuan traffic light chu a lo sen leh ta a, ngunthluk zawka indap chian nan hman ka tum a ni. Ka tluk teuh em avangin ka tha khurte chu a la reh chiah lo va, ka lungphu pawh Krismas chhang dengho an inrawn mai pawh ni lo inthumrawn ang mai hian ka la hre thei. Lo tlu ta ila ka tleng thui hle ang a, ka hnunga rawn tlante khan min rawn su ngei bawk ang a ka chan chu a chau khawp ang. Red light chu kan thleng ta, bike chu ka’n en hmasa ber a, ka han indap leh thuak thuak a. Ka kutkawr thler dan ka’n enchian chuan thil hriam tak zai a ni tih hai rual a ni lo, enge ni ta ang?.

He thil chhui chhuak tur hian sherlock Holmes ka mamawh rei lo, CBI kuta hlan mai chi pawh a lo ni bawk hek lo. Ka bike sir tawn tawnah chuan hrui hi a lo uai duah mai a, a fei em em mai bawk a; tin, a ni,  a tle bawk. ‘Hei ngei hi anih hi’ ka ti rilru ta a. Lehkhachaih chaihna hrui, mizorama kan hman ang ni lo hrui fei chi, mi dang lehkhachaih hrui an ahna tura darthlalang them an zut tel ngei mai chu lo niin, chu chu kawng vangtanin a lo inthlung a lo ni. Ka’n su chiah kha ka kutkawr zai thlerin ka tawn phei ta a, ka tlanchak em avangin fei tak pawh nise a lo chat ve mai kha a ni.

Ka sungtuahna a kal thui ngei mai, kha lehkhachaih hrui kha feet khat velin lo inthlung sang deuh se chu ka hrawk zawnah a ni ang a; kutkawr, wool tha mi a vang zawng pawha at kak hlawk thei khawpa hriam chuan ka tisa nem lai tak hrawkhruiah ngei mai han zai ta se engtianga thukin nge a zai ang tih hi a tak tawn loh chuan ka hre lo. Feet khat khat pawh a ngai ‘nem, inches 6 a tawk, a tir khan ka banah min lo bat chu ni se, ka ban awn deuh khan ka hrawk lamah a hruai chho mai dawn hi a lo ni a, enge ka an ang ka hre bawk hek lo, mahse a hlauhawm takzet. Heng zawng zawng hi lo thleng ta se, ka bike thunun tur ka awm lo vang a, tualcharah mi hlimpui thin lehkhachaih kha ka lo thihpui thei reng a ni tihte muangleiah ka han dawn kual leh rih a, ka hlau hnuhnawh ta hle a ni.

Tumkhat Aizawlah mi pakhatin lehkhachaih hrui kawng vangtana inthlung scooter-in a su tawh a, a hrawkah nasa takin thi a chhuak a, a thih leh thih loh ka hre zui ta lo. Kha pa chan kha chu a la nep viau ang, hrui reng a inhriam hleihin kan intlanchak hleih em mai.

Hei hi ka hrethiam thei lo, engtinnge ka hma a mite khan su si lovin keiin ka sut bik theih? Mahse hei erawh ka hria-Pathianin min veng tih hi.