AIRPORT-A KA TAWNTE

Thlawhnaah hian ka la chuang tam lo hle nachungin mak tak tak(ka tan chuan) ka tawng thin a, han ziah chhuah ve hrim hrim hi ka chak tlat. Thu ril leh un pui pui han sawi tur nei ve ta lo chu ho tete kan ziak kan ziak mai zel dawn zawng anih hi.

Tumkhat chu Lengpui airport atang Kolkata lam panin kan thlawk a, tluang takin Kolkata kan thleng a; airport-ah chuan Pre-paid taxi la turin ka ding ve a, chutia ka hun a lo thlen chuan ka kalna tur sawi pahin ka pawisa ka’n phawrh dawn a, wallet ka lo ak reng reng lo mai! Thlawhna chhung ka thutnaah a tla-a ka kalsan a ni. Engkhaw sawi set set lo chuan Pre-paid counter chu ka tlansan ta a, mak tiin min thlir zui nasa teh e; thlawhna kha a lo chhuah leh hman ka hlau a ni. Engtinnge ka tih ang tia ka ngaihtuah lai chuan piah deuhva ka lam lo pan airport-a thawk niawm tak badge bel chu ka va zawt ta chawt a. Ani chuan departure counter lam chu min kawhhmuha chak deuh chuan ka tlan phei ta a, security lam chuan chutia tlan pelh ngawt mai chu an lo phal awkawng lo chu lo niin kei lah chuan hun khawhral ka tum der si lo- min rawn um phei ta a ni. Chutah min kawhhmuhna ka va thlen chuan security lam pawh chu ka hrilhfiah a(mak deuh chu ka hmel a chiai hmel an hmuh avang khan a ni ang min zui mai, min dang nasa lo) mahse chuta kal tur chu a lo ni leh pek lo. Hmun dang min kawhhmuhna chu ka va kal leh a, a lo ni chuang lo. Chutia thinrim taka ka awm lai chuan air hostess pakhat ka hmuh chu ka’n zawt leh a, kalna tur dik tak chu min kawhhmuh ta a, police an lo kal a min rawn pe leh ta a ka lawm hle; remark min ziahtir a tha deuhin ka comment nghe nghe kha.

Tumkhat leh chu Lengpui atang bawkin ka nupui leh ka fapa nen, kan nula nen Kolkata kan pan a, bungrua kan ngah em avangin kan chawi belh nghe nghe; hemi ni hian kan awmna Mathurapur ban kan tum avangin a chhuak hma(kingfisher flight ticket)kan la a ni. Kan thlen fel hnuah thawmhnaw bawm nghakin kan awm a kan bungrua hrawl leh pawr tak tak chu an rawn tawlh chhuak ve zel a. Mahse a kim ta hauh lo, thingrem(trunk) a tel lo a ni. Chutah kan la ding reng a, air hostess an lo kal a min rawn zawt fiah a. An han inbe kual a kan thingrem chu a len ve loh avangin Indian airlines-ah an rawn thawn hi a lo ni a, ka lawm ta hauh lo. Ka thu lo leh min rawn lova ka thawmhnaw thlawhna danga an dah kha ka thin a rim tlat, leng lo khawp engvangin nge ticket an pek ka ti a ni. Tlemtein ka buk chuanga min ngaidam thei lo va ngaihdam ka tum bik lo. Chu air hostess chu ka’n vin hrep mai a, a ni hrehawm ti chuan an station office-ah min hruai phei a an pu nen chuan kan inhau ta anih chu. Kan nu chuan min lo zahpui deuh ni tur a ni ‘ngawi tawh mai la’ a rawn ti dek dek thin a, ‘lo tawng suh’ ka ti reng bawk a.

Ngaihdam an dila ka ngaihdam theih loh thu ka hrilh tawl a, chutah Mizoram-a manager min biaktir a kan inhau nasa hle. Min tlawn lungawi an tuma ka buk chuanna man pek let min tiam a, ka duh lo va; ka veivelnaah kg20 ken belh theihna lehkha pek min tum a, ka la duh chuang lo va ka lak chuan tham theihah min ngai ang te ka ti rilru vel a. Awm lo ka zawnpui a, theih loh ka ngen a ni. Mizote leh North East-mi hi min hmusita min tham lo a ni ka ti ve tlat a, racism lamah ka kailut a an hlau tual tual bawk a; chutia min en luih lai chuan kan thingrem phurtu pawh a lo thleng ve thuai a air hostess pathum hian an rawn zawn trak trak a, an dahna hmun turte ka lo kawhhmuh vel a engmah hlawkna chang ta chuang lo chuan kan liam ve leh ta a ni, mahse khami tum khan han pawr kha ka chak ve hrim hrim, min tham lo deuha ka hriat thin avangin.

Tumkhat leh pek chu Lengpui atang bawk thlawh ka tum a, Kolasib atang zingah kan chhuak a. Kawng a chhia an tih avangin Scooty pahnihin min thlah a. Min thlahtu pakhat kha a tlan muang leh lutuk a, a’n tlu leh rawl nen kan tlai ta khawp a. Lengpui kan thlen chuan ka tlan phei sawk sawk a ka va ngaihven a mahse luh an lo phal tawh lo reng reng a. Ka chuanna tur thlawk liam laite chu kan thlir ta vel mai mai a, sum sen belha atuk atana ticket kan han tifel chu tha a na duh ngei mai. Indian Airlines chu ni se min la phalsak ngei ngei ang mahse ka lo inhauhpui hrep tawh kingfisher-an ni tlat, an khawngaihnate chu ka’n dil tha leh vel a ni. Departure-kha dar11:30-a ni a, dar 11:5-ah ka thleng a min pawm thei tawh lo a ni; kei chang a ni lo connecting flight ticket nei pawh an tlai ve teuh si, ka chan chu a la tha ber hial ang. Kingfisher-a thlawk turte tan chuan thlen hma hi a lo tha lehzual tih ka hriat chhuah phah ta a ni, a thawktute paw’n an ti ve tho ‘Indian airlines chu ni se an ngaidam ang che min ti’, mahse a hnemhnanpui tlak chuang loh-tlai chu tlai.

Tumkhat dang leh chu Kolkata airport atang kan chhungin mizoram lamah haw kan tum a. Thlawhna an cancel zin tawh em avang chuan mizo kan thahnem ngang mai. Kan rawt a, ‘hawh u kan thahnem bawk a additional flight i dil ang u, pakhatah chuan kan leng tawh chuang lo’ kan ti a. Hetih lai hian kan minister pakhat pawh a awm ve a, mahse vip lounge lamah min bik bo san a. Kan rorel chuan awmzia a nei dawn lo tih kan vip leh sawrkar mi lianten silchar flight cheng sing chuang senga min laksan danah chuan a lang tan a ni. Kan thlawh hun a lo thlen chuan engmah thawm a la awm lo va, a hnu deuhvah chuan an cancel leh dawn tih a chiang ta.

Re-schedule turin ka inchuh luih luih a, kan bawh huam huam a ni ber; tlangval pali lu kawng tak tak hi an awm ve a, mizotawng lo chu eng tawng mah kan thiam lo an tih avangin tanpui turin min ngen a, ka theih ang tawkin ka puia atuka thlawk turin ka siamrempui a, an lawm ve hle. Keini erawh chu atukah pawh cancel leh kan hlauh avangin silchar ticket ka la a,  ‘Aizawl la cancel leh se’ tia rilru chhia put a awl dawn dawn mai. Sawrkar officer pahnih, pakhat hmeichhia mizo nu tak training zo haw tur hi an awm bawk a, a mipa zawk chu a rui deuh va a hmeichhia zawk chuan buaipui a tuma mahse a ti hlei thei lo va, phungbawmah min rawn sawm ve leh a;  kan sawrkar officer lian tak pakhat a awm bawk a ka titlang zel a. Vaiho chu an intithei em em a, ka bula sawrkar officer lian tak pakhat pawh chu an vin hreh hauh lo mai a ni. Ka rilru a na ru em em a, ‘ngawi ru tifel phawt ila kan hau dawn nia’ ka ti a, kan tih fel chhung chu kan dawh a ni.

Kan zawh fel hnu chuan vaiho hau turin ka va kal leh ngat a, ‘in va polite lo em em ve, tunge in nih a, enge in nih? In vin tur kan ni lo reng reng, nichina in vin pakhat kha in hria em, india sawrkar-ah hian lal dan indawtin intlar ta ila in in hmu pha lovang(Pu HL malsawma’n mi pakhat a hauh dan an sawi ka hriat ka hmang ve a) hetiang anih chuan sawi chhuahna tur kan zawng ve dawn’ ka va ti a, a tawp bera ka sawi chuan a titim hlawm hle. Engmah ni si lo kha ka inla bora-lui a, ‘tunge kan nih a, tunge in nih in hria em’ te ka va ti a, dawt erawh ka sawi chuang lo. Han tih tak hrepah chuan ngaihdam an dil ve ta a, ‘ni 5 an cancel tawh a kan buai thei lutuk a, kan hah bawk si a, kan lo vin leh thin a ni, min hrethiam teh u’ an ti a, hriatthiam loh ngawt lah chu kan tih tur a ni bik si lova, mahse an inhmuhchhuah phah ve tal chuan ka ring, tlem talin.